السبت، 23 مايو 2009

Mad City

من حوالي شهر كده رجعت من الكلية العجيبة اللي انا فيها
و قررت اعمل عصيان والقي بالمذاكرة جانبا
واتفرج على التلفزيون
و انا باقلب في القنوات لقيت فيلم اجنبي لجون ترافولتا
و على الرغم من اني مش من معجبيه لكن قلت اهوه اتفرج واستعيد مواهبي في النقد الفني
لاول مرة اتفرج على فيلم اجنبي واخذ بالي من اسمه لا وكمان من اسم البطل ......اصلي بصراحة مش بدقق في
الحاجات دي
المهم
الفيلم كان(MAD CITY) فكرة الفيلم ببساطة بتحكي عن مواطن امريكي(سام) بيشتغل حارس امن في متحف وامينة المتحف بتقرر انها تستغنى عن خدماته بسبب العجز المالي عن دفع مرتبه
وكمان لا عندها حارس اخر ذو خبرة اعلى
سام بيقرر انه يهدد امينة المتحف بسلاح ناري وشنطة مليانة ديناميت .... لعلها تسمح باستمرره في العمل
لكنه بيتورط في قضية قتل الحارس زميله وصديقة الاسود اللي حاول مقاومته لحماية الاطفال فخرجت رصاصة عن طريق الخطأ اصابته
و كمان بيضطر يحتجز اطفال كانوا في زيارة للمتحف مع المشرفة وامينة المتحف
من خلال احداث الفيلم بنكتشف احد الاعلاميين بيكون على مقربة من المكان وبيحاول يستغل ده في عمل سبق صحفي ونقل الحدث حي لسكان المدينة
من وجهة نظري هنا بتبدأ الاحداث و الرسالة من الفيلم
سام بيكتشف وجود الاعلامي (ماكس)
و ماكس كمان بيكتشف ضعف شخصية سام واضطرابها
و ان ما بدر منه كله ناتج عن تفكير خاطئ متسرع فبيقود هو دفة الامور
هنا الفكرة
اعلامي متميز عايز يعمل خبر وبروباجندا و يواصل حياته العملية بنجاح
و انسان عادي متسرع طفولي له بيت واسرة فجأة بيهدده الفقر نتيجة لتوقفه عن العمل
بيحاول ماكس يكسب الرأي العام لصالح سام ....مش لان سام يستحق ده......لا.....ده هيفيد ماكس في صناعة قصة ينشغل بها الرأي العام
و هنا يظهردور الرأي العام
الرأي العام المتقلب الغير مضمون زي ما بيوضح ماكس لسام
ماكس بيحاول يكسب الرأي العام قدر المستطاع و في حذر لانه ببساطة رأي غير ثابت لكنه مُجدي
خصوصا امام هيئة المحلفين اللي هي برضو جزء من الرأي العام
لكنه بيفشل لوجود منافس له اعلامي اخر بيحاول قدر المستطاع يفشل كل محاولات ماكس
و بجهد بسيط جدا بينجح في تحويل الرأي العام للنقيض
بتظل الحرب الاعلامية قائمة بين ماكس ومنافسه و بيظل سام الكرة الدائرة في ملعب الرأي العام
الى ان يستطيع البوليس ان يحرر الاطفال نتيجة لتوتر سام وتصرفاته المتسرعة جدا
الواضح فيها عدم سيطرته على الموقف
و بينتهي الفيلم بانتحار سام بتفجيره الديناميت و بيصاب ماكس بجروح خلال الانفجار
عندها بتظهر الحقيقة لماكس وانه هو منافسه القصة اللي اراد صنعها هم السبب في انتحار سام الشخصية الطيبة القلقة على اسرتها
فبيعترف بكل اسى انهم هم من قتله
لكن بعد فوات الاوان
القصة طويلة مش كده
لكنها فعلا عجبتني و فكرتني بمسرحية مصرية للكاتب (محمد ابو العلا السلموني ) اسمها "ديوان البقر"
كلا القصتين بتتكلم عن حقيقة اتجاهات الرأي العام و كيفيه صناعته والتاثير فيه
و ازاي انه متقلب غير ثابت سهل الاقتياد على الرغم من فاعلية اثره
بطل الفيلم سام مش شخصية بشعة وشريرة ولا هو في نفس الوقت ملاك
لكنه شخصية مجتمعية موجودة اخرجها الاعلام من اطارها الطبيعي وحاول يشكلها كما يحلوا له
لعمل قصة وفكرة فحدث اعلامي ضخم
اجتذاب الرأي العام القلق على وضع اسرة ربها قد يُسجن وتحرم من العائل ...
و على الجانب الاخر استطاع المنافسين من تصوير القضية على انها تفرقة عنصرية لان الحارس الابيض قتل الحارس الاسود في مجتمع عانى لسنوات من حروب عنصرية اهلية
ولان المختطف شخص شرس بشع اختطف اطفال ليساوم عليهم
كلا الصورتين بعيدة عن الواقع لكنها لعمل حدث جذاب لاغراض شخصية بحتة
و ده بالضبط اللي حصل في مسرحية (ديوان البقر) رسم صورة للرأي العام على اساس احدى الخرافات ونسبها للدين من اجل الوصول للحكم
يا ترى كام مرة اتعرضنا لصورة مغلوطة لمجرد جذب انتبهنا و استخدام ردود افعالنا لمصالح شخصية؟؟؟؟؟؟؟

الخميس، 21 مايو 2009

يوميات راكب 1- ( يوم ما اتعطل المترو)

طبعا لا يخفى على اي مصري انه بيقضي ما يقارب تلت عمره المديد راكب مواصلات
طبعا ما هو احنا شعب عايش في اطار ضيق من بلده
لازم تكون الدنيا زحمة ..... ولما الدنيا تكون زحمة الاشارة هتطول و لما الاشارة تتطول هتقضي وقت جوا العربية او الميكروباص والاتوبيس او المتوسيكل
و يمكن تنفد لو معاك عجلة
ناهيك بقى عن المنقذ الفذ للوضع المأسوي المزدحم >>>>>>>>>>>>>>>>> المترو
اهو المترو ده عايز عمر لوحده
كل كام يوم كده هادخل احكي يومياتي كراكبة
ما هو انا لو مش حكيت ممكن يجرى لي حاجة ...... وانا اصلا تحت ضغط
هاحكي النهاردة عن يوم كان فيه المترو متعطل
1- يوم ما اتعطل المترو
المترو دايما بيتعطل في الايام اللي درجة الحرارة فيها مرتفعة قوي .....ليه ؟؟ تقريبا كده بيعاقبنا
ما علينا كنت انا وسارة صاحبتي مخلصين يوم حافل من الايام الدراسية العصيبة
و بعدها روحنا نركب الميكروباص اللي هينقلنا من الجامعة لمحطة المترو
و بعد ساعة الا ربع وصلنا محطة المترو لقينا ناس كتير واقفة
و كان من السهل استنتاج ان المترو عطلان .......لكن ليه ما يكونش في تنويه عشان الناس تكون عارفة ؟؟
المهم جيه المترو وكان متشبع بالبشر و دخلنا كان معناه موت محقق بالاختناق . فقررنا _و لا اسف على ذلك_ اننا نستنى اللي بعده
بس اللي بعده مجاش ....... بعد انتظار نص ساعة في الشمس والزحمة والزننننننننننن
قمنا قررنا وبرضو _ ولا اسف على ذلك (حتى الان)_ اننا نرجع ونستخدم الميكروباص مرة تانية عشان نروح لبيتنا بقى
و بعد حوالي نص ساعة في الشمس لقينا ميكروباص وللاسف ركبناه
السواق كان داخل سباق مع الزمن بيسوق طائرة نفاثة حضرته...
احساس صعب انك تكون بتطير داخل عربية وحاسس انك هتفلت من الجاذبية
و يمكن تفلت من الدنيا كلها
و فجأة هدا السرعة ووقف وخرج من العربية
خير...... في ايه؟؟؟؟؟
اختفى السواق ...
و بعدها بحوالي تلت ساعة كده .........
عاد ساقنا الهمام ..
ركاب في عربية ميكروباص في الشمس في انتظار عودة الغائب ..اقصد السائق
لما رجع السواق احد الركاب اعترض
كنت فين يا بني مش تقول انك هتسيبنا وليه تتاخر كده احنا ناس شقيانة وناس عنده شغل ومصالح ..
واتقلبت خناقة
لازم تعرفوا قاعدة هامة ....... السواق دايما على حق
السواق كان بيملى مياة عشان عطشان حق انساني بحت ...... والركاب الوحشيين مش مقدرين الاحتياجات الانسانية
شريرين
فيها ايه لما تسنى في العربية.. قاعد مستريح في الشمس .....سونا طبيعي غيرك بيدفع ثمن السونا
طبعا لان في احد الركاب اعترض و ده مش من حقه لان السواق جهة سيادية
كان العقاب ان العربية ما بقتش طايرة لا صاروخ بسرعة الضوء
طبعا بعد السواق ما وقف و نزلنا كنت مش دايخة .... كانت واخدة عجلة تسارعية ( العجلة بمعناها الفيزيئي)
و دماغي كانت تسبح في ملكوت تاني خالص
لما روحت فضلت نايمة لتاني يوم........... ولان القدر كان لازم يسخر من راكبي المواصلات .....كان عندي تاني يوم امتحان
في رباعية لجاهين احب اهديها لسارة شريكتي في هذة المغامرة الميكروباصية
زحام و أبواق سيارات مزعجـــــة
اللي يطول له رصيف.. يبقي نجـــا
لو
كنت جنبي يا حبيبي أنــــــــــــا
مش كنت أشوف إن الحياة مبهجة
انا عارفة ان المغامرات معايا مبهجة...مش كده يا سمسم؟؟؟

انا تحت ضغط

وحشتني الكتابة بس بقالي اسبوع كده كنت تحت ضغط ..... فيما يعني كان عندي كلية وامتحانات
و ما ادراكم ما هي امتحانات قسم هندسة كميائية......... الاعجاز
الغريب اني كل ما اقول لحد اني زهقت وطلع عيني
يقول لي بمنتهى الهدوء هانت كلها سنة و تخلصي....ده طبعا من المقربين لي
لكن بفرض اني باكلم حد من محبي الالقاب الاقيه بص لي من فوق لتحت وقالي ونبرات صوته تنم عن خنقة
في الاخر هتبقي مهندسة
و عندها لما باسمع كلمة مهندسة دي باشخط فيه واقوله
من فضلك اسحبها لو سمحت.
اسفة اني باقول كده
بس اللي بيتعمل في مهندسي المستقبل مش بس يخليهم يكرهوا كلمة مهندس
لا
يندموا على الايام اللي ذاكروا فيها ايام ثانوي
وعلى مجرد الشروع في التفكير في دخول كلية من كليات القمة القسم العلمي الرياضي
يمكن يندموا انهم اتولدوا اصلا
تخيلوا انسان تحت ضغط
عايش في الكتب وحياته معادلات و معامل وشيتات وكويزات
لا وقت لديه
انسان بيدخل سجن تعليمي بحت لمدة خمس سنين لا اعياد رسمية ولا فرعية
العيد هو فترة تذاكر فيها لامتحانين على الاقل.......... و يمكن تعمل فيها مشروع
الرحلات اوالزيارات والمصيف والكلام ده .....لمحات من الماضي
احسن لك ما تفتكرهاش عشان ما تبقاش سيكوباتي
انك تبقى طالب هندسة معناه
انك تذاكر مناهج لا صلة بينها ويمكن ما تستخدمهاش اصلا خلال عملك ومتفهمهاش وانت بتذاكرها ......
بس هتمتحن فيها ويتعدي.......... يتعدي............
احسن لك
ممكن تاخد منهج في اولى كلية ( مش هاتكلم عن اعدادي عشان الجرح عميق من ناحيتها)
وتسأل سؤال في منتهى البراءة هو انا هاعمل ايه بده؟؟؟
يكون الرد
ده مهم جدا بس مش هتستخدمه دلوقتي
و يمكن يكون المحاضر اكثر لطفا ويقولك هتستخدمه في تطبيقات كذا وكذا وكذا
و تكتشف انه بيتكلم عن قسم اتصالات وانت قسم كميا
و بعد رحلة عناء مع المادة اللي طبعا هتتحفظ لانك مش عارف هي ايه كينونتها اصلا
تمر السنين وتلاقي نفسك في احتكاك مباشر معاها
ايه ده هو انا مش كنت خلصت منك.
و طبعا تكتشف ان المادة لها تطبيق عندك و تكتشف برضو انك مش فاهم منها حاجة وان الدكتور مش هايعيد لك حاجة انت درستها
و ان انت ماعندكش وقت تدور عليها وتذاكرها
يبقى الحل انك تحفظ ما يخصك منها مرة تانية
تخيل انك تحفظ معادلة ....تحفظ مسالة او طريقة حل.... وانت مش فاهم حاجة
ولو حاولت تفهم هتضيع وقت ولو ضيعت وقت هتضيع مادة ولو ضيعت مادة هتقعد معاك تونسك السنة اللي بعدها ولو قعدت معاك هتضيع وقت في مذاكرتها ولو ضيعت وقت.................... وهكذا دواليك في دائرة مغلقة
عشان انت طالب هندسة لازم تكون سوبر
تفهم بسرعة اي حاجة وكل حاجة ......ننسى بقى موضوع الميول والقدرات
ده كلام علم نفس واحنا بتوع رياضة
انت مهندس يعني سفنجة هتمتص كل ما يتاح اليك
هل بقى اللي بتمتصه ده هيفيدك.. هتستخدمه.. هيزود اعبائك ..هيوقف مخك
او حتى هو علم اكل عليه الزمان وشرب
دي مش مشكلتهم دي مشكلتك
انت دخلت هندسة برجليك............... عشان تخرج منها على رجليك
لازم تكون عامل حسابك
انت انسان تحت ضغط .... انسان نسي ان من حقه الانساني الترفية وممارسة هواياته
انسان تقريبا اللي حواليه بينسوه لانه بيشفوه مصادفة على السلم او وهو نايم
انسان بيدفع مقابل العلم صحته وماله و جهده وعلاقاته باهله و بهواياته و انسانيته ........
انسان بيطالب اللي بيعلموه ببعض الرحمة وبالنظر اليه على انه انسان من لحم ودم
و عنده اعصاب يا تتحمل يا تفرقع
مش سوبر كمبيوتر
انسان بعد ما يتخرج يكتشف ان اللي هيستخدمه من اللي درسه الثلث فقط (و باعتراف اللي درسوا له هذا العلم)
و ان الثلثين التانين كانوا ضغط .....
عشان انت مهندس هتشتغل تحت ضغط
و هتعيش تحت ضغط
و يمكن تموت بالضغط

السبت، 16 مايو 2009

باكلم نفسي

ساعات كده لما بحس اني لوحدي ......او مش لوحدي
بس حاسة بألفة مع كياني مع وجودي
مع نفسي
بحب اقولها جمل ... جمل ليها معنى ليا ولها
و يمكن اللي يسمع الجمل دي يفهم لها مغزى خاص به هو
في الموضوع ده كل شوية هازود جملة هي مش لحد
هي لنفسي ....و يمكن حد تاني يأخذ منه مغزى
و على فكرة من حقكم انتم كمان تكلموا نفسكم بس من غير عنف
قولوا لها كلمة تفدها.....
16/5/2009
@ RENEW
WORK AS YOU CAN .........DO YOUR BEST
19/5/2009
TRY TO BE MORE CALM

الجمعة، 15 مايو 2009

مشحونة

ساعات كده بحس اني مشحونة
ملحوظة :انا في هندسة كميائية يعني كلامي هيكون في مصطلحات عجيبة كتير فنتقبلها بقى وامرنا لله
المهم زي ما قلت باحس احيانا اني مشحونة , المشكلة مش في الشحنة الموجبة المشكلة في السالبة
الشحنة السالبة في تعريفي للشحنات هي كل المشاعر السالبة
فجأة كده بدون اي مقدمات الاقي نفسي متكهربه و الجو مشحون بغيوم
ده بقى يعمل اكتئاب
على غضب
على خنقة وحرقة دم وقلق
كله كده مع بعضه
يمكن ده بسبب الضغط الدراسي ويمكن بسبب اني بمل بسرعة
ويمكن لاني بحس احيانا ان مفيش فايدة واني باحفر في الصخر
و يمكن يكون السبب ان الانسان ممكن تمر به مراحل يحس فيها بضعف العزيمة والوهن والرغبة في السكون
كده وصفت القضية ..... قضيتي اني احيانا باكون مشحونة بشحنة سالبة
طيب والحل
الحل فين؟؟؟
اكيد في كلام زي بلاش يأس انتم امل المستقبل انتم الحاضر السعيد والمستقبل المبهج
تمام
انا مقتنعة بده ..... بس المشكلة ان الشحنات دي لازم تلاقي حاجة تهديها ,تعادلها , تسحبها برضو ممكن
مشكلتي دائما في توجيه شحناتي .....ما هو انا لازم اوجهها لاحسن افرقع
احيانا تكون الشحنات دي قدرات مدفونة نفضت ترابها وخرجت
لكنها لاقت ان الوضع غير مهيأ لاستغلالها فثارت عليا واعلنت العصيان
و احيانا تانية تكون النظرة المتشائمة لنص الكوب الفارغ اللي مش راضي يتملي
و ممكن ضغط الاستفزازات الخارجية دراسة على معاملات
هل ممكن يكون في حل لمشكلة انسان سالب الشحنة؟
حاجة كده يعملها تغير حالته تعادل شحناته او توجهها لاتجاه يمنحه استقرار؟
هل ممكن يكون في حل لده؟
ولا اشوف لي دكتور نفساني متخصص شحنات؟؟؟

الخميس، 14 مايو 2009

على اول شارعنا........ فرح

على اول شارعنا فرح
دي حقيقة على فكرة وانا باكتب الكلام ده
في على اول شارعنا فرح
واضح انه فرح جامد جدا الدي جي شغال من الساعة سابعة
ولسه مكمل
وهيكمل
وهيطربني بكل اغانينا التراثية من نوعية الحنطور وبحب يا..... والعنب والخيار والسلطة
واغاني تانية كده مش باين الكلام من قوة تاثر حنجرة المطرب العظيم بالكلمات واللحن
فالاصوات خارجة في ما يشبه صوت شكمان عربية بيودع
اه
نسيت اقولكم عقبالكم ...و الف مبروك
نرجع لموضوعنا
لما بيكون في فرح في شارعنا او على اوله او حتى على بعد كيلو كده
لازم اكون عارفة قبلها باسبوع ......
ليه؟؟؟ .........سؤال وجيه جدا
لان في مجتمعنا ناس مقتنعة تمام الاقتناع ان الشارع والحارة والمنطقة والحي والمحافظة
ابعدية خاصة
لما يكون عندهم فرح لازم يكون فرح محترم
اغاني بقى طول النهار والليل
والصوت لازم يسمع سابع جار ....مش النبي وصى عليه لازم نفرح قلبه الحزين
و لا عزاء بقى للمرضى واخواتهم المصدعين ... ولا عزاء للطلبة ولا لاي بني ادم راجع من شغله تعبان عايز يرتاح
عشان كده لازم ابقى عارفة من قبلها عشان اغير جدول اعمالي و احضر ادوية
الصداع والمهدئات
لكم ان تتخيلوا اني حاسة اني جوا خلاط
وانا وداني هاتفرقع عشان تحي العروسين
بذمة بقى ده يبقى اسمه كلام ؟؟؟؟؟؟؟؟

تحذير ...د/ اكرامي قورة


قصيدة تحذير للشاعر د/ اكرامي قورة
قصيدة بتجذبني جدا
بحس ان فيها رومانسية مخلوطة بواقعية حياتية مرحة
مافيهاش تكلف وبسيطة جدا
انا فعلا بحب القصيدة الصغيرة دي جدا
تحذير
د/ اكرامي قورة
تحذرني من الشايِ
الذي يحتل إفطاري بلا ندٍ !
تحلفني بعينيّا
فأحلف كاذباً عمداً
وأشربه
تعاتبني
تحلفني بعينها
فأهجره وأكرهه
وبعدُ أعود أشربه على بعض الحليبِ
فوا عجباً لمعتلّ الهوى
إن هام حباً بالطبيبِ!!

مش هي اللي عايزة كده

بيقولوا طالما المرأة طالبة المساواة
يبقى تتساوى مع الرجل في كل شئ
مش هي اللي عايزة كده
يعني تتبهدل بقى زيهم
تركب مترو في الزحمة وتقف طول السكة وتتزق وهي رايحة تركب الميكروباص ....
ماهم واحد بقى
يتطلب منها اعمال شاقة في العمل
مش هي اللي عايزة المساواة
و مش بعيد بكرة يدخلوها الجيش بالعند فيها
طيب طالما كده بقى
ليه الراجل طالما في مساواة بقى ما يقعدش في البيت يمسح ويغسل ويكنس و يربي العيال
و يتحرق دمه في المذاكرة لهم
و متابعتهم و يروح يتسوق ويقف في طوابير العيش
و يوم الاجازة ينضف البيت و يغسل الستاير والسجاجيد
و ياخد باله انه ينشر من غير ما ينقط غسيله على غسيل الجيران
عشان مش عايزين مشاكل
اعتقد المساواة مكنش الغرض منها اننا ناخد حاجة منهم مش من حقنا احنا ما اخدناش شغلهم و لا حاجة
ولا زحمناهم ولا عايزين نديق عليهم
الحكم بالكفاءة طالما انت مش كفء طور نفسك بدل ما تقعد تدور على حجج فاضية
واعذار اقبح من الذنوب
و لا احنا طالبنا بالمساواة عشان احنا منكرين لدور الرجل
ولا عايزين نقضي على مكانته احنا بس عايزين حقوق اتهضمت عبر الزمن لحد ما اترفع شعار
احذر المرأة ....الخطر الداهم على الامة
و كأن الراجل ملاك سلط عليه كيدهن عشان ينكد عليه دنيا واخرة
المجتمع عنصرين كلاهما متساوي في حقه في الانتفاع بحقوقه اللي كفلتها له ادميته و تعاليم الاديان
بلا قيود او شروط و لا وصايا
زي ما كلاهما متساوي امام المجتمع و امام القانون
و متساوي في الواجبات اللي عليه حسب وضعه و قدراته
المرأة مش عدوة الرجل......هي شريك
اقبله او لا تقبله .....لكنه شريك
لازم تعطيه حقوقه اللي اعطاها له ربنا ........مش تحجر عليه وتلغيه و تقول هي دي القوامة

الأربعاء، 13 مايو 2009

هاتكلم براحتي

السلام عليكم
لقيت ان نفسي اتكلم من غير ما حد يعارضني
اتكلم براحتي .........اقول رايي بحرية واناقش و اعترض
انا مش هاتكلم في السياسة>>>>>>>> عشان دمها تقيل
بس هاتكلم براحتي عن فكري و ارائي عن حلمي لبكرة وخططي...........ده لو فيه يعني.
هاعرض اللي يعجبني من شعر وادب وصحافة
و كل اللي طالباه من اعضاء مدونتي الكرام انهم يحترموا رايي
زي ما هاحترم ارائهم
و يناقشوا......ده لو حصل نقاش يعني....... باسلوب متحضر و راقي
بعيد عن العصبيات والكلام العجيب ده
و الا>>>>>>>> هاضرب نار..واضطر الغي اي رد مووووووش تمام

لولا اختلاف الرأي يا محـــــترم
لولا الزلطتين ما لوقود انضرم
و لولا فرعين ليف سوا مخاليف
كان بيننا حبل الود كيف اتبرم ؟
عجبي !!!!