I didn't asked anybody to tell me his comment about me and
I will never do
I am is me
you like this. OK , deal

you don't ...............go to hell

مصارحة

هل ممكن الانسان ينظر جواه و يوصف اللي صادفه في اعماقه

صفاته ميوله عيوبه افكاره احقاده ..... مين بيحب و مين بيكره؟

لما بتقعد مع نفسك و تكتشف الخير اللي فيها

الصفات الجميلة المميزات و نقط الجاذبية

اكيد بتحس بالراحة الرغبة في الحياة
بالحصول على الافضل و زيادة العلاقات

لكن لو غصت فيها اكتر في لحظة صدق معها قبل ما يكون صدق مع اي حد تاني مهما كانت صلته بقلبك

و شوفت بعينيك عيوبك .... حسيت بها ...... و حسيت ضررها و اللي جنيته منها و اللي عملته في غيرك

اكيد احساس الصدمة



احيانا كده باقعد مع نفسي في لحظات مصارحة

اكلمها و احكي لها

على فكرة انا صريحة جداااااااااا

و هي كمان صريحة معايا لاقصى حد.......... لدرجة اني اول من يلوم نفسي لو غلطت

و اول من بيستمتع بألمي و ذهولي من نتائج عيوبي

لكن للاسف المصارحة دي دائما بتيجي متأخرة و في لحظة باكون فيها عملت الغلط خلاص

و مش عارفة ان كان الواجب على اظهره و اجني العقاب و لا اسكت و استنى مداخلات القدر

المصارحة دي خلتني اكتشف اخيرا

اني انا مش شخصية نموذجية ولا مكاني المدينة الفاضلة

و ان الصفات الكويسة اللي فيا غالبا ما بتكون هي نفسها العوامل المساعدة لعيوبي على الظهور و احداث الكوارث

اعتقد ان شخصيتي ينطبق عليها المثل " جنت على نفسها مراكش " دائما

لان الصراحة والتسرع والتهور ....... اتحاد مفلس

زي ما التسامح و الرغبة المحمومة في الانتقام .... متناقضات واضحة


انا حقيقي نفسي ابطل صراحة

نفسي اتحكم في كلامي و ابطل اقول اللي جوايا ببساطة كده

كاني باقول نكتة

نفسي اسيطر على صراحتي
افكر قبل ما اتكلم...احسبها

نفسي اسامح من غير شروط
و نفسي ابطل عصبية واندفاع

لاني مع كل العيوب دي

عايزة افضل وسط الناس

عايزة احس بالزحمة و دفئ العلاقات

نوبة غضب

امبارح كنت هادية الى حد ما

و قد اكون كنت عادية يعني لا هدوء ولا غضب

ده كان لحد الليل

عادة ما الاحساس بيتغير مع هدوء الليل و سكونه

امبارح افتكرت اصدقائي و اصحابي ..... حسيت اني مفتقداهم جدا

مفتقدة الكلية و الشقى و المذاكرة ...... مفتقدة مرح اصحابي و اصواتهم و صورهم

و افتكرت اني هافقدهم كمان لمدة اطول ....... و هاعيش الوحدة مش بس كاحساس داخلي

مش متخيلة ان ممكن تمر سنة كاملة عليا ....اروح كل يوم الكلية وارجع من غير ما اقعد ارغي واصدع سارة

كل مرة بنتكلم فيها مع بعض باكتشف ان بينا تكامل غريب .. اذواق متفقة و احيانا اراء مختلفة

لكن احساس ممتع ان يكون لي صديقة مثقفة و ليه نظرتها الخاصة باكون مستمتعة بمناقشتها

هتمر ايام من غير ما اقدر اكلم نشوة واحكي لها و اخرج اللي جوايا

و نقعد نحلل العقد الكتير اللي عندي ...... و نحل في المشاكل اللي مابتنتهيش

على امل تحصل المعجزة و يمر يوم من غير مشاكل و لا عقد و خناقات

انا باعشق هدوئها و حكمتها و قدرتها في السيطرة عليا و على عصبيتي


حتى دفعتي وحشتني ..... بتوحشني استفزازات الدكاترة والكويزات

و نرفزة المشاريع و خناقاتها

اول مرة احسن ان كل العناء ده كان متعة في حد ذاته

لكن كالعادة بنحس بلذة الشئ لما بينتهي او يقرب ينتهي

ساعات احساسي اني اتظلمت بيخنقني

باحس اني بركان جواه حمم مكتومة ممنوعة تخرج

بركان اتخلق عشان يحرق نفسه و يستمتع بعذاباته في ساديه

قلق و خوف و غضب و مع كل ده الوحدة و الملل


و مع ذلك انا هاصمد

لانه قدر...... لانه امر الله

و لانه خير

و لانها نوبات جزع و ضعف و غضب ..... و دي طبيعة بشرية

لا اله الا انت سبحانك اني كنت من الظالمين

كفاية

هو لاي حد المفروض اراعي مشاعر الناس ؟

طيب لو هما مش بيراعوا مشاعري .....مش عاملين لمشاعري حساب و لا قيمة

افضل انا اراعي مشاعرهم ليه؟...... افضل انا احرق في دمي وفي اعصابي و اجي على نفسي ليه ؟

صحيح في ناس ليها عليا فضل ...... لكن مينفعش يبقى قيد يشل مشاعري و يحكم كرامتي

ماينفعش اكتم الضيق عشان خايفة من ردود الافعال افضل اتألم و اشقى لوحدي .... من غير اي امل في تجديد و كل ما اجي اتكلم احس بالذنب و تأنيب الضمير..... اسكتي ليهم عليكي جمايل وافضال ما تبقيش ناكرة للجميل

و ارجع ألمي للايام و الزمن والقدر ........ عشان احتاجت في يوم للمساندة او مساعدة

نفسي اقول زي الست في "فات الميعاد"
كفايه بقى تعذيب و شقى

ملاحظة

في حاجة لاحظتها

كتير قوي الاقي اطباء او صيادلة ......عندهم حس ادبي عالي جدا

كتاب و مثقفين و شعراء

على الجانب الاخر تلاقي مهندسين منجذبين للسياسة والتحليل السياسي و شغل السياسة عموما

و تلاقيهم برضو عندهم حس نقدي و بيكتوا مقالات قويه

كطالبة في هندسة اقدر اقول ان المهندسين بيتعاملوا مع الرياضيات والفيزياء والنظريات والفروض

كل شئ عندنا له مقدمات و اثار و ردود افعال

عشان كده بنميل للتحليل
مهم لنا نشوف الصورة كاملة مش مجرد رتوش
ممكن ننتقد نكتب عن قضايا شغلانة وشاغلة الناس نحللها ونقدم حلول

و اكيد هننجذب للسياسة يمكن لان قوانينها مش واضحة او بتعتمد على السرية احيانا
فكل واحد بيدور على التفسير اللي يناسب تفكيره واسلوبه

دي رؤيتي عن المهندسين

بس بصراحة ما اقدر اوضح بشكل سليم ليه الاطباء بيتجهوا للادب سواء الكتابة او الشعر
يمكن لانهم اكثر ارتباطا باحاسيس الناس
و لان التعامل مع المرض تعامل مع ابتلاء بيصحي جوا الانسان احساسه كانسان فعلا
بيخلق جواه شفافية للكون ككل

على كل حال لكل مهنة ودراسة تأثيرها مش بس العلمي
لا كما على مستوى الشخصية والتفكير واسلوب الحياة

عايزة اكتب

بقالي مده عايزة اكتب حاجة

و بعدين ادخل و ما اكتبش اي شئ

ليه مش عارفة

مع ان كان في دماغي حاجات عايزة اقولها و الله

بس فجاءة كده حسيت برغبة في الصمت الرهيبِ

طبعا ده مش طبعي

بس اهوه ......ربنا يهدي

لكن انا برضو عايزة اكتب

وحشي احساس الانتصار اللي بحس به وانا باعمل

نشر للرسالة

احساس ممتع

ادعوا لي اكتب تاني

عشان انا عايزة اكتب

shopping

كتير من اصحابي بيعتقدوا اني شخصية بيتية قوي
بمعنى اني من محبي المكوث بالبيت ..... و ده حقيقي الى حد ما انا فعلا قرار الخروج ده بيكون تقيل عليا قوي
طبعا انتم عارفين ان المرأة محتاجة على الاقل ساعة او اتنين عشان تخرج

اكيد طبعا لانها اكتر حرصا على مظهرها واناقتها

ما علينا

على الرغم من ان خروجي قرار باخده ببطئ و تحديد الميعاد بيكون بعنايه عشان انا بارجع في كلامي بسرعة

بس بمجرد ما باخرج بيبقى من الصعب تقنعني نرجع تاني

غريبة دي

لكن انا فعلا باخرج بالعافية لكن لما باقرر خروجة او فسحة و حاجات من دي لازم بقى استمتع

امال خرجنا ليه بقى ؟؟؟؟؟......عشان ننكد على بعض

انا بقى باكون في قمة السعادة لما اخرج عشان اشتري حاجات

هدوم بقى ولا اي حاجة مش فارقة

المهم اعمل

Shopping

احساس ال shopping رائع .....لا فعلا حاجة ممتعة جدا

ليه بقى ؟

انا باعتبر ان الshopping فن

انك تقرري تخرجي تشتري حاجات وتشتري الافضل .... حاجة تكوني راضية عنها و ماتندميش بعد ما تشتريها

حقيقي لما باشتري حاجة و ارجع البيت و الاقي ردود الافعال لطيفة باكون مبسوطة جدا
عشان كده قرارعمل ال shopping مش اي حد ياخده و مش اي حد تاخديه معاكي

لازم يكون شخص مقرر يشتري و مش اي حاجة و السلام ......حاجة عدلة

زي ما قلت لك ده فن
وليه خطوات طبعا ......مش فن

1- لازم يكون المبلغ اللي معاكي يكفي و فيه بند محترم للطوارئ
عشان غالبا ما بننسى و نصرف فلوس المواصلات حتى

2- لازم لو اخده حد معاكي تكون صحته كويسة مش يرفع الراية البيضة بعد خطوتين ولا شارعين كده

3- لو اخدتي حد عشان تاخدي رايه لازم يكون ليه رأي مش خارج تحصيل حاصل

انا عن نفسي اتخنق من اللي اقوله ايه رايك يقولي" كويس لو عجباكي اشتريها " لا والله افادكم الله

4- لازم اللي هيروح معاكي يكون عارف انه ممكن يرجع بخفي حنين (اكتر من مرة )

ما هو احنا مش هنشتري حاجة اي كلام ...هو احنا بنلاقي الفلوس ؟

هو شئ محبط لكن وارد


انا عن نفسي مش باقتنع بالموضة ..... لازم اشتري حاجة تليق عليا انا
و ممكن الاقيها و مش يعجبني السعر او ما يعجبنيش اللي بيبيعوا نفسهم

احيانا بقى باخرج ومش في دماغي خالص اشتري حاجة و فجاءة الاقي نفسي قررت اعمل shopping صغنن كده

(ده طبعا لو معايا فلوس ........... وده نادرا طبعا )

ساعتها لو اشتريت حاجة باكون في منتهى السعادة ........باعتبرها هدية الاقدار

* مش باقول لكم ال shopping بالنسبة لي متعة

احساس انك اشتريتي حاجة راضيه عنها و مناسبة ليكي و هتلاقي قبول .....احساس يخليكي في تطلع تظهريها

يعني مثلا لو هدوم هتلاقي انك عايزة تخرجي باي شكل ( ان شاء الله تجيبي عيش )

لا فعلا ال shopping حاجة ممتعة جدا

مش عارفة ليه الرجالة مش بيحبوه ....( مش وش نعمة )

12/12

12 ديسمبر

يوم ميلادي


ناس كتير بترفض تحتفل بيوم ميلادها .... او مش بتدي الامر اي اهمية

بالنسبة لي يوم ميلادي يوم بانتظره

مش باعمل حفلة كبيرة و لا باعزم حد ...لكن باستمتع جدا باحساس ان في ناس سعيدة حواليا بان عندي مناسبة لطيفة

مش باحسب سني كان كام و هيبقى كام؟

لكن باشوفها بطريقة تانية .........ان سنة مرت وسنة جديدة بدأت

بافتكر اللي حصل خلال السنة الفائتة و بحب ادور على حاجة تحسب لي اكون عملتها خلالها

و اتمنى الحاجة اللي نفسي تحصل السنة الجديدة

احساس ان سنة انتهت شئ مريح بالنسبة لي
و ان سنة هتبدأ صفحة جديدة هتتكتب

بيكون عندي امل تكون افضل على كل الاصعدة

السنة دي حاسة .........سعيدة ان سنة انتهت لكن قلقانة من اللي جاية

احساس غريب عني .....

لكن ما علينا

كل سنة وانا طيبة برضو

يا رب السنة دي تكون افضل من اللي قبلها ليا و لكل اللي حواليا و لكل العالم ان شاء الله

و يا رب اقدر اعمل فيها خطوة كويسة في حياتي .... تغيرها للافضل و تأثر بشكل ايجابي على اللي حواليا

دعواتكم بقى

يمكن 12/12 يكون له علامة في التاريخ

نجيب محفوظ

اليوم
11/12

ذكرى ميلاد كاتب نوبل المصري نجيب محفوظ

نجيب محفوظ على الرغم ان الحظ لم يسعدني الا بقراءة واحدة بس من اعماله

لكن انا سمعت في الراديو و شفت في التلفزيون اكثر من عمل من اعماله

و كانت بتعجبني جدا مقالاته في الاهرام

نجيب محفوظ هو فعلا نبض المصري البسيط

روايتاه كانت من مصر ولمصر

اجمل اعماله بالنسبة لي بداية ونهاية و الطريق و الحرافيش

انا بصراحة من اشد المعجبين برواية بداية ونهاية و رواية الطريق لانهم واقعيين جدا و فيهم استمرارية
بمعنى انهم مش مرتبطين بزمن

اعتقد انه استحق نوبل عن جدارة

لانه نقل للعالم مصر باهلها بحاراتها و بشوارعها

مشاكل الناس العادية اللي ممكن تقابلهم كل ثانية

قدر يوصل مشاعرهم وافكارهم و يغوص داخل ذاتهم و يكشفها ببساطة بدون ابتذال او تضخيم

و كان عايش و حاسس بنبض الشارع و متابع معاه كل حدث

انتقد و قدم الاوضاع بدون تحريج و بدون متاجرة بالالام

الله يرحمه


نجيب محفوظ

قنبلة

قنبلة
مش الكلمة اللي ممكن تشرح انا عايزة اوصل ايه؟
لكن ده مجرد احساسي بالحالة
حالة انك تكون بتتعامل مع حد .... الحياة بالنسبة له سيطرة

انت مش فاهمه مش فاهم رد فعله
ولا ازاي تتعامل معاه
ازاي توصل له رأيك ؟
ازاي تفهمه و ازاي يفهمك ؟

ازاي تتجنب غضبه الغير مبرر ؟

يكون بالنسبة لك مُقلق
تكون عايش على طول في قلق و حذر وخوف

احساس ان جنبك قنبلة انفعالية

اي كلمة او تصرف مقصود او غير مقصود ممكن ينتج عنه انفجار
حياتك تنفجر
كل شئ يبقى بيغلي ........ اعصابك وسط نار
وافكارك في زحمة
و اللي حواليك مش عارفين ينجوا بنفسهم ولا يساعدوك

و لا الكل ياخد قرار انه يتحرق


اكيد لو كل انسان بيفكر و لو ثواني

انا بالنسبة للي حواليا قنبلة انفعالية؟
مصدر قلق ؟
محرض على الخوف واليأس ؟

هل وجودي في موضع مسئولية عن حياة انسان ممكن يدمره ..يدمر اعصابه و احلامه و احساسه الامان ؟

ممكن اكون ام متسلطة مسيطرة ...... و زوجة جاحدة
ممكن اكون اب متسلط مسيطر مش شايف الا فرماناته .... و زوج ظالم


هل انا نيرون .. الامبراطور الحارق؟

هل ممكن لو فكرنا في ده ولو لثواني

نلاقي مبرر نقنع به أنفسنا اننا لازم ولو لدقائق

نسمح لعيونا تشوف لوحات غيرنا عن الحياة و الدنيا
لوحات احلامهم ...... امالهم
يمكن نفكر فيهم بشكل احسن و يكون لنا المكان المناسب في اللوحات دي

مش هتخسر لو فكرت في غيرك
في احساسه
في انطباعه عنك
مش هنخسر لو كنا مصدر اشعاع امل وحب

في علاج للملل؟

كتير باحس بملل بشع
مش ملل بس
لكن احساس اني فاضية جدا جدا جدا لدرجة سخيفة

مش لاني فعلا مفيش حاجة اعملها ......غالبا ما بيكون عندي حاجات محتاجة اقعد احط جدولها وابدأ في تنفيذه

لكن مابعملش كده !!!

ليه ؟؟

سؤال وجيه بصراحة معنديش اجابة

يمكن اكون فاقدة الرغبة في العمل الوقت ده

او فاقدة الاحساس بالامل
او غالبا فاقدة الاحساس بالوقت

انا فعلا محتاجة اعمل وقفة مع نفسي و مواجهة واسألها: ليه الاحساس بالملل والتراخي ده مع انك المفروض مشغولة ؟ ليه قتل الوقت ؟

يمكن دي تكون ثورة عليا من نفسي لان الملل و قتل الوقت بتكون نتيجتهم الاكتئاب

و هذا يعني اني ممكن اكون في طريق للاكتئاب ......بس بصراحة انا حاليا ماليش مزاج اكتئب:d

لاني لو اكتئبت ( بعد الشر عني طبعا) غالبا ما هاحس بالملل برضو من الاكتئاب نفسه

انا كتير باحاول اخرج من احساس الملل ده

اسمع راديو ....احاول ادور على حاجة على النت اكون طبعا مأجلها زي العادة
او اجمع صور

لكن بافضل حاسة بالملل والزهق

ساعة لما بتكون حاسس بالملل .....الاحساس ده بيقتل الرغبة في المبادرة
يعني حتى لو في حل
بتعمله بغصب و انت مش مقتنع به

يا ريت فعلا يكون في علاج للملل ....... اعتقد انه هيكون علاج رائج جدا

آفة حارتنا النسيان

آفة حارتنا النسيان

جملة من اكتر الجمل اللي وقفت قدامها كتير قوي ....كل ما اقرأها اعيدها تاني

الجملة دي هي تذييل كل فصل من فصول رواية الكاتب المصري نجيب محفوظ
" اولاد حارتنا "

ليه كررها كتير .....ليه ركز عليها .......ايه سر الجملة ؟

ده كان لغز الرواية بالنسبة لي...... على الرغم من كل النقد اللي تعرضت لها الرواية في مضمونها او القالب اللي اختاره محفوظ

الرواية كلها بالنسبة لي هي الاسقاط ...آفة حارتنا النسيان

و بعد سنتين من تاريخ قرأتي للرواية مع كل ذكرى لمحفوظ و مع كل مرة يُذكر فيه امامي

افتكرها واسرح معاها ... ليه قالها و ايه معناها ليه كررها؟

دلوقتي فهمت

ممكن تعيدوا الجملة في اذهانكم كده

آفة حارتنا النسيان

اتُفق ان النسيان نعمة و راحة و رغبة في الاستمرار

لكن هل ممكن يتحول لآفة ؟


لما تمر بموقف اكتر من مرة وفي كل مرة تمر بالتجربة تخرج صفر اليدين لانك بتنسى ....يبقى النسيان آفة

ما اقصدش مشهد من مشاهد الحياة يتكرر
اقصد تجربة بالمعنى الاعمق للكلمة
تجربة تشمل فعل ورد فعل و استنتاج ومشاهدة
مش بالضرورة يكون السيناريو واحد .... لكن المضمون واحد

لو كل مرة بتتعرض لفشل بتقفل الصفحة و تواريها النسيان
لو كل مرة تغلط فيها في حق نفسك او حق غيرك بتنساها
لو ما بتتعلمش من تجاربك واخطائك وتجارب غيرك واخطائهم و بتفضل النسيان .

يبقى النسيان عندك آفة
مرض

لما التاريخ يعيد نفسه و نغلط نفس الغلط
يبقى النسيان آفة
لما ننسى بلدنا و كرامتها و مجدها
و فجاءة نفوق و نفتكر ان كل ده في ايدينا واننا احنا بس القادرين على حماية كيان البلد واسمها و تاريخها وحاضرها
و اننا نسينا نشتغل
نسينا ننتج
نسينا نعتمد على نفسنا
نسينا ان صدارتنا كانت بتزيد كل ما عملنا يزيد و كل ما انجازنا يزيد و كل ما نضيف لحاضرنا و كل ما نخطي لمستقبلنا

يبقى النسيان عندنا آفة

النسيان عندنا مرض اخطر من اي وباء مزمن مرت به البشرية في تاريخها

آفة حارتنا النسيان

لما انسى ان الاهرام و ابو الهول والمعابد و القصور و المساجد والكنائس
و كل اثر و ركن في بلدي مش حجارة ابهر بها العالم
ده نتاج عمل و مجهود

ليه مش فاكرين من تاريخنا الا آثاره و ناسيين انه نتاج عمل
ايد نحتت وايد رسمت و ايد رفعت حجارة

بشر تفانوا في عشق بلدهم وخلوا كل ركن منها اسطورة ...... رمز للرقي

ليه بننسى ان من انجز الشئ احق بالفخر به
و ان الرقي والحضارة والتمدين محتاجين افعال مش فخر اجوف

ليه بننسى الحضارة والرقي و مش بنفتكرهم الا لما بنتهان
ليه نعمل نفسنا اضحوكة و نجسد من فخرنا الاجوف رمز للسفه و قلة الحيلة

لاننا نسينا

نسينا ان اجدادنا عملوا ده بمجهودهم وعرقهم
و لاننا نسينا
اننا عشان نبقى احفادهم لازم نستلم التركة كلها مش بس المجد والزهو
لا
كمان العمل و الجهد والعرق
اخدنا من التركة ما يقر الاعين
واللي يسهرها نسيناه


لان


آفة حارتنا النسيان

Falling Down

Falling Down

فيلم بطولة مايكل دوجلاس

بيمثل فيه دور شخصية محبطة ومكتئبة ومنفعلة

شخص اسمه بيل بيمر باكتر من موقف في يوم واحد مواقف عادية لشخص مش عادي

شخص مستبعد من عمله و مطلق وممنوع بامر قضائي من رؤية ابنته ....فاقد الثقة والامن

و بينظر للي حواليه نظرة اتهام ورغبة في الانتقام ...قنبلة موقوتة مستنية لحظة انفجار

كل اللي مر به موجود وواقع في حياتنا بشكل مثير ومستفز ..كل يوم ممكن نمر بنفس المواقف

من اول الجشع في الاسعار والالتزام الاجوف والبلطجة

والثراء الفاحش اللي جانبه بالضبط فقر مدقع

فيلات بحدائق غناء واندية خاصة يفصلهم سور واحد عن ساكني الشوارع والمعدمين

ناس بتسرق البنوك عشان تبني قصور وناس من فاقدي الثقة الاقتصادية محتاجين قروض بس للعلاج

كام مرة مريت من شارع ولقيته زحمة عشان حفرة مفيش سبب لحفرها اصلا

كام مرة اترصف شارع و بعدها اتفحت تاني عشان تركيب مواسير كان ممكن تتركب الاول

كام مرة غلوا اللحمة والفراخ وقالوا اوعى تقرب من السمك عشان مسمم و المياة فيها جراثيم

كم مرة قابلنا حد مؤمن اننا كلنا بنغرق و هو بس صاحب الحق في سفينة نوح

كلها مواقف بنعيشها واقع مر او حتى مقزز

لكن لازم يكون له حل ..لان اكيد في قنابل موقوتة كتير على وشك الانفجار

مش تسأل....؟

كلنا بنغيب وبنبعد عن بعض و فين وفين لما بنفتكر نسأل ولا نسلم

ده بقى سمة العصر وشئ اصبح من الطبيعي....... ممكن نقول اننا كلنا مشغولين و في حالة شقى دائم

طيب طالما كلنا عارفين

ليه دايما لما حد بيبدأ و يقدم خطوة تجاهنا ويسأل عنا ولا يزورنا

نلومه ونتعمد نقول: انت فين يعني .....هو انت بتسأل ؟ ....هو انت فكرت تسأل؟

ليه؟

انا مش بسأل ...... اختفيت لاي سبب.... يمكن مت

ليه انت ماتسألش؟

انا ما فكرتش اسأل وانت ما فكرتش تسأل ... كلانا متساوي في التقصير

طيب ليه تتعمد تلومني ؟؟؟؟؟

ليه لما ابدا ان المبادرة توقفني و تتهمني

مع ان المثل بيقول اللي بيته من ازاز.......

بستسهل و نغطي عيوبنا من منطلق خدوهم بالصوت...

اسهل حل ترمي الاخطاء على غيرك وتتجاهل نفسك

انا مش هاقول اني انا كمان مش مقصره .يمكن ما اسألش لمدة وباغيب .

لكن لما بارجع باشيل قوي هم اللوم .....هو انت بتسألي ؟

طيب ما انا ممكن اسأل نفس السؤل؟

ليه تلومني وانت واقع في نفس غلطي؟

ليه بنفتح دفاتر ممكن تتقفل للابد في لحظة بنبدأ فيها من جديد

فاكرني

عندك اجندة ؟

مش اجندة للسنة فيها ورق وسطور ومترقمة بايام السنة

انا مش اقصد الاجندة بمعناها المادي ...مش كراسة مليانه ورق.. NOTE BOOKمن نوع خاص

اجندة في الذاكرة ممكن نقول سجل او كتاب

بندون فيه مشاعرنا . افكارنا . احلامنا ممكن اقوالنا او افعالنا او انطباعاتنا

اللي عمالناه و اللي هنعمله

كل واحد مننا عنده الاجندة دي...... او الدفتر ده حسب تعبيرات مصلحة الضرائب

لما بتعمل حركة جدعنة مع حد ....وقفة في ازمة او مجاملة في مناسبة سعيدة او سؤال عن احواله ولا حتى تعزمه عزومة مركبيه

تلقائي بتروح على الاجندة دي وتدونها

في يوم ساعة العصر قابلت فلان على السلم و قلت له ازايك يا راجل عامل ايه _ مع اني مكنتش طايق نفسي وعلى اخري_ قلت له اتفضل و دخلته و عسرت على نفسي ليمونة وعزمته على الغدا

و تفضل محوش الملاحظة دي ومخزنها و يمكن تستدعيها كل ما تشوف صاحبنا فلان

و يمكن تنساها؟ نسيان مؤقت او دائم

صحيح بتنساها ؟ متأكد انك نسيتها

طيب استنى كده

في يوم صاحبك فلان شافك و عينه جات في عنيك و عمل انه ولا شايفك ولا كانه يعرفك

هاه ازاي الحال ؟ هتعمل ايه؟ هيمر الامر مرور الكرام كده؟

لا

تلقائي هتروح على الاجندة و تطلعها وتفتكر بقى يعمل معايا انا كده .. بقى هي دي اخلاق بقى دي اخرت الجدعنة

****

كلنا بندون في اجندتنا اعمالنا . موقفنا التي لا تنسى يمكن حلوة ويمكن مواقف وحشة اتعملت فينا

عندنا مبدأ

انا عملت ...............> لازم تجازيني

طيب هل سالت نفسك

هل غيري مدون عملي ده في اجندته؟

هو عنده اجندة اصلا ولا بيبصم؟

هو انا هاروح لكل واحد اقوله انت عندك اجندة ولا لا و اللي عنده اعبره واللي معندوش ما يلزموش

و لا هاقول لكل واحدعملت معاه جميل ...من فضلك سجلها يمكن احتاجها قريب

اكيد لا

بس عشان تتاكد ان الناس فكرينك وفاكرين مواقفك و حافظينها في قلوبهم وفي الاجندة

بص على جندتك؟......هاه مدون ايه؟

مدون اللي غيرك عمله عشانك؟ ولا بتبصم ؟

كام مرة كاتب .....انا - انا عملت - انا اتجرحت - انا زعلت

على مقدار اللي عندك هتلاقي عند الناس ويمكن اكتر

لو في في اجندتك صفحة لغيرك هتلاقي كتاب لك عند كتير

وحسب نوع صفحتك هيكون نوع كتابك

افتكر لغيرك يفتكروك و يفتكروا لك

كما تدين تدان

ماتقوليش وانا كمان.....2

على فكرة هو فيه سبب كمان اقوى يخليني ارفع شعار .... ماتقوليش وانا كمان
بقالي مدة باقرا في كتاب
قوة عقلك الباطن
الكتاب حتى الان لذيذ جدا
الكاتب بيحاول يوصل فكرة انا الانسان ليه عقل واعي وله عقل باطن
العقل الباطن هو العقل اللي بيتحكم بشكل كبير في وظائف الجسم التلقائية اللي العقل الواعي مالهوش سيطرة عليها
زي اننا بنتنفس واحنا نائمين واجهزة جسمنا بتشتغل
بتحلم بحاجات فنتازيا او يمكن تحلم بحلول لمشاكلك
مع ان المفروض انك نائم
ده عقلك الباطن
الكاتب بيؤكد من خلال عدة وقائع ذكرها
ان تعاملنا الجيد مع العقل الباطن ممكن يصنع معجزات
و التعامل الجيد مع العقل الباطن يكون بانك تستغله الاستغلال الامثل
وتوجهه التوجه الصحيح
لان العقل الباطن زي البستان اللي بتزرع فيه بذور سليمة او فاسدة
محصول البذور دي هينعكس على حياتك كلها
هينعكس على وظائف جسمك على اسلوب تفكيرك على ادائك في الحياة
طيب ازاي؟
بفرض انك قلقان من مادة ما مش عارف تذاكرها
قل لنفسك بقوة انا هذاكر وهانجز وهاحقق نجاح
و شوف النتيجة
مثال تاني
بقالك مده قلقان من النتيجة
قل بقوة انا مش قلقان
انا هانجح لاني عملت اللي عليا
ولان ربنا موجود وانا واثق انه هيقدر لي الخير

ايه علاقة ده بشعاري؟

الكتاب كان بيتكلم عن الايحاء
و ان الايحاء ده ممكن يكون ليه قوة كبيرة التأثير على عقلك الباطن
في التنويم المغناطيسي مثلا عقلك الوعي بيكون نائم وعقلك الباطن مستيقظ تماما
بمجرد ما بتوحي له بشئ بينفذه بمنتهى الدقة
يعني لو طلبت من حد يرمي نفسه من البلكونة وهو نائم تنويم مغناطيسي
هيرمي نفسه في منتهى الهدوء
طيب
هل لما انا اكون مضايقة
محتاجة دعم
واشتكي لحد قريب مني
المفروض اني باشتكي له لاني عارفة انه هيكون مصدر دعم لي
و لاني في احتياج لحد يطمني لحد يساعدني
و اقوله انا مخنوقة
هل رده وانا كمان هيقدم لي ده

بالعكس هو بقوة الايحاء هيروح على عقلي الباطن ويقوله
انت قلقان جدا و انا كمان قلقان موت و كل اللي حواليك قلقانين
و طريقك مسدود مسدود مسدود

تفتكروا انا هيكون وضعي ايه؟
اكيد هتدمر نفسيا
و زي ما انتم عارفين اننا اصلا تحت ضغط
اللي كنت محتاجاه ايحاء ايجابي و دعم
انتهى بي الامر لصورة سودة عن الحياة
عشان كده انا مش هاقبل من حد انه يزود همي
ولما احتاج منه دعم يديني دواء لدعم الاكتئاب

كل ما عليك انك لو عاجز عن مساعدة غيرك خليك ايجابي وادعمه بايحاء ايجابي
طمنه و اكد له انه مش في الدنيا لوحده
و ان لو في دلوقتي عقبة ما بشوية صبر وايمان و ثقة بالله وبعدله
كل العقبات هتزول و هترجع الحياة لجمالها تاني
بلاش تقوله وانا كمان
بلاش تدمر اللي حواليك بسهولة
خليك ايجابي

ماتقوليش وانا كمان.....1

السلام عليكم

من مدة كده بتاع سنة تقريبا
كان في حد مضايق قوي من اصحابه واللي حواليه
وكنت باتكلم معاه كنوع من التخفيف وبعدين قلت له
كل انسان عنده مشاكله وحاول تحط لهم عذر و لازم اننا نراعي اننا ما نكونش عبء على غيرنا
و ما نطلبش منهم اشياء ممكن تكون مش في استطاعتهم
كنت مقتنعة بده ساعتها
كنت كتومة شوية
بس مع الوقت اكتشفت و اتاكدت ان الانسان بطبيعته بيكون عايز حد يكلمه
يشكي له ياخد رايه
يخفف عنه او يدعمه
فبدأت اغير رايي
ليه لما اكون مضايقة
وده شئ طبيعي ودائم
ما اعبرش عن نفسي بحرية واقول يا جماعة
انا مضايقة حد يلحقني
يمكن اكون اتخنقت من الدراسة ومن الكلية ومن الاحوال
ويمكن لاني قلقانة من نتائجي الرائعة المتقدمة دائما
و يمكن اشتكي من الصداع اللي واخد شقة تمليك في دماغي
لكن المشكلة مش في كده المشكلة ان الرد الرسمي هو
و انا كمان
الكلمة دي بجد بجد بتحرق دمي
يعني هو ممكن اكون انا مخنوقة وهاطق والاقي كل اللي حوالي كمان مخنوقين
هل فعلا ممكن اللي انت بتشعر به يكون بنفس حدة واسلوب غيرك
اعتقد لا
طيب ليه كل ما اقول لحد انا مضايقة .انا مخنوقة هاطق
يقولي : وانا كمان
طيب انا دماغي هتنفجر ..يقولي برضو وانا كمان
طيب جات ازاي دي؟؟؟؟؟؟
عشان كده اضطريت ارفع شعار
ماتقوليش وانا كمان
لا تقل لي وانا ايضا
و معنى اني قررت ارفع الشعار اني هاتعامل بيد من حديد مع كل من تسوله له نفسه انه يفرسني وانا مضايقة ويقولي وانا كمان
و ما ادراكم بقى بالايد الحديد بتاعتي

أنا و جاهين..(1)

ساعات مش بلاقي كلام يوصف حالتي الا الشعر

ولما بافكر اوصفها كده زي ما هي واديها وضعها

ما بلاقيش افضل من كلام جاهين ينطق بلسان حالي

عجبى عليك يا زمن يا أبو البدع

يا مبكى عينى دماً

ازاى اختار لروحى طريق؟

وأنا اللى داخل فى الحياة مرغماً

عجبى !!!!!

مرغم عليك يا صبح مغصوب يا ليل

لا دخلتها برجليا ولا كان لى ميل

شايلنى شيل دخلت أنا فى الحياة

وبكرة هاخرج منها شايلنى شيل

عجبى !!!!!

يا باب أيا مقفول .. امتى الدخول؟

صبرت ياما واللى يصبر ينول

دقيت سنين والرد يرجعلى : مين؟؟

لو كنت عارف مين ... أنا كنت أقول

عجبى !!!!!

سهير ليالى وياما لفيت وطفت

فى ليلة راجع فى الظلام قمت شفت

الخوف كأنه كلب سد الطريق

وكنت عاوز أقتله بس خفت

عجبى !!!!!

مهبوش بخربوش الألم والضياع

قلبى و منزوع من الضلوع انتزاع

يا مرايتى ياللى بترسمى ضحكتى

يا هل ترى ده وش ولا قناع؟؟

عجبى !!!!!

يا قرص شمس مالهوش قبة سما

يا ورد من غير أرض شب ونما

يا أى معنى جميل سمعنا عليه

الخلق ليه عايشين حياة مؤلمة

عجبى !!!!!

يا حزين يا قمقم تحت بحر الضياع

حزين أنا زيك وإيه مستطاع؟

الحزن مابقالهوش جلال يا جدع

الحزن زى البرد زى الصداع

عجبى !!!!!

على بعد مليون ميل من أرضنا

من الفراغ الكونى بصيت أنا

لا شفت فرق ما بين جبال أو بحر

ولا شفت فرق بين عذاب أو هنا

عجبى !!!!!

يومى على الله تنتهى وتغيب الشمس ..

وتعود تانى يوم لهاليب

زى الحياة مأساة ومن كترها

بقى لا انتهاءها ولا ابتداءها عجيب

عجبى !!!!!

ما تفتحش بقك

هل عندك الجرأة ولديك الشجاعة تقول رأيك؟؟

استنى ما تجاوبش فكر شوية

لو اتعرض عليك موضوع فيه خلاف ما بين جماعات جماعة ضد وجماعة مع وجماعة على الحياد

تقدر تقول رايك بصراحة من غير خوف

طيب لو تقدر ...........

تقدر تتحمل اللي هيجرالك؟

تقدر تبقى منشق و مدعي ويمكن مشعل فتنة

دي الحقيقة

كونك تقول رأيك ده في حد ذاته سهل جدا

كونك تتحمل نتائج رأيك هو ده اللي صعب

خصوصا بقى لو كان رايك مش مع الجمع الاكبر

ويا سلام لو الموضوع فيه ولو نسبة قليلة في اتجاه الدين

هتبقى الحرب اقصى ما تكون

لانك مش هتسلم من الناس اللي بتأول الدين و بتفصله على المقاس ....

كل كلامه متأيد باية او حديث او فتوى

حتى لو كلامهم غلط و فكرهم غلط و استدلالهم بالدين غلط

هتبقى انت الغلط و انت اللي خارج عن الدين و انت اللي بتدعوا للفتنة و الفتنة اشد من القتل

و هتلاقي مليون سوط جاهزين لجلدك ........مليون سكين غايتها تجز رقبتك

و هتبقى حرب ضد الضلال و مش بعيد يتهموك بضعف الدين والعزيمة

ولو قاوحت هيكفروك

و هكذا هنضطر جميعا نرفع شعار

ما تفتحش بقك احسن لك

و لما تتزنق قوي ابقى اعترض

بس في سرك

....RENEW

السلام عليكم

بقالي كتير جدا مش باكتب

النهاردة حسيت اني محتاجة اتكلم فقلت اكتب هنا .....

اخرج شوية من الشحنات اللي باتشحن بها كل مدة

بعد الامتحانات حسيت اني عايزة اعيش في سكينة بعيد عن المتاعب

و عايزة مخي يقف

يقف بجد من غير ولا فكرة ولا حتى لحظة تفكير واحدة

ليه؟؟؟؟؟

كنت حاسة اني بجد مجهدة ... جهد معنوي

مش قادرة اكمل ولا قادرة ارجع ومستحيل افضل واقفة

ممكن في اي وقت انفجر ...... انفجار صامت في هدوء تام

فقلت طيب ما اغير المؤشر. احاول اريح مخي ده وادي له اجازة

اقوله من فضلك ممكن تبطل شغل خد لك اجازة اجبارية

انا نجحت اوقف التفكير شوية ..لكن من وقت للتاني كنت بلاقيه بيفوق كده ويبدأ يسخن ويبدأ شغل

و احيانا كنت باضعف واسيبه كمان يشتغل

افكر بقى في الدراسة والنتيجة وبكرة والمستقبل والخطط

و لما الاقي الدنيا بتقفل اقوله من فضلك افصل شحن

النهاردة كان اول يوم في التدريب .....

ومن حظنا معانا السنة دي مشرف معيد عندنا في القسم

قعدنا نتكلم كده معاه عن الكلية والمشروع مشروع التخرج

قالنا اننا المفروض نبدأ من دلوقتي

مستحيل

ساعتها استدعيت مخي من السكون اللي هو فيه اجباريا

و بدا تاني الفكر

كان لازم بقى شوية صراحة

انت عايزة ايه بالضبط؟

لقيت مفيش رد

طيب وبعدين

هل المفروض نفضل في حالة الهدوء واللامبالاة دي

ولا ممكن شوية حركة ونسيب اللي مش في ايدينا لربنا

و نحاول نجدد شوية ونغير ولو بسيط

ما ينفعش نعتبر نفسنا محور الارض وتفضل هي تلف من حوالينا

واحنا واقفين محلك سر

هندوخ ونقع

عشان كده ..... الفترة الجاية ان شاءالله لازم يكون فيها اسلوب جديد

RENEW