الاستخدام الاسوأ (2)......" التحكم في جنس الجنين "

السلام عليكم

انا قلت لكم انهم موضوعين

الموضوع التاني
هو حدث علمي اول مرة اسمع عنه كانت النهاردة
موضوع علمي طبي
التحكم في جنس الجنين

المفروض ان الحدث الطبي ده كان سنة 2001
بس انا اول مرة اسمع عنه بسبب فروق التوقيت غالبا

في 2010 بقى اللي هو وقتنا الحاضر نشرت رويترز مقطع فيديو لزيارتها لاحدى العيادات في مصر
قالت فيه انه الذكور مفضلون لاختيار نوع الاجنة في مصر
و طبعا الخبر ممكن تلاقوه على كل المواقع العربية الاخبارية

الخبر بيقول يعني ان موضوع اختيار الجنين ده موجود و وصل لنا الحمد لله
و اننا كمان بدأنا ناخد وندي معاه اهوه و نستخدمه
و معظم اللي هيستخدموا التكنيك الاعجاز ده
ناويين ان شاء الله
يختاروا الذكور

اظن كده بقى الرجالة اتحلت عقدتهم مننا ..... خلاص بقى في حل لمشكلة زيادة عدد الستات في مصر
الاجيال الجاية كلها رجالة ان شاء الله
و هيستوردوا ستات شقرا من الخارج طبعا ..اهو تحسين لنسل


انا طبعا كان اول مرة اعرف الخبر فبدأت ابحث عنه و اكتشفت انه كمان في ايجاز من الازهر لاستخدام الطريقة دي
عند الضرورة

لكن ايه هي الضرورة؟

ده اللي عرفته من جريدة الشرق الاوسط
يوليو 2001 العدد 8265

نشرت صحيفة «ديلي ميل» البريطانية في عددها الصادر يوم الخميس 5 يوليو (تموز) الحالي خبرا على صدر صفحتها الأولى بعنوان كبير جاء فيه: «اختر جنس اطفالك» نقل فيه كاتبا المقال بيزي مارش وجيمس شابمان، عن مؤتمر طبي كبير عقد بمدينة لوزان السويسرية في 4 يوليو الماضي ان معهد Genetics and IVF Institute in Fair Fax في مدينة فرجينيا الاميركية منح املا جديدا للعوائل التي تعاني من خلل جيني يصيب ابناءها الذكور دون الاناث مسببا امراضا وراثية خطيرة من امثال ضمور العضلات Muscular dystrophy وفقر الدم الوراثي Hemophilia وغيرهما، كما قدم فرصة ثمينة للراغبين ـ نتيجة ظروف اجتماعية معينة ـ في انجاب اطفال ذكور او اناث، ان يختاروا جنس المولود الذي يفضلونه.

يعني الاطباء عملوا مؤتمر قالوا فيه انه الضرورة ان في ناس ممكن يتولد عندها الذكور بامراض وراثية
فالافضل ينجبوا اناث

تخيلوا الموضوع اتعمل لانجاب الاناث ونسبة نجاحه في انجاب الاناث 92%
و في انجاب الذكور 72%

ففي سبب علمي للابحاث دي ولاستخدام الجراحات من النوع ده

طيب هل احنا في مجتمعنا هنستخدم الجراحات دي عشان اسباب علمية
لا
احنا هنستخدمه اجتماعيا

احنا مجتمعات مؤمنة انه الخلود يكون ببقاء اسم العيلة
و اسم العيلة يحمله الذكر
فلازم عشان اسم العيلة ما يموتش يبقى فيها رجالة يورثوه و يورثوه لابنائهم

و الا ماتت العيلة و اندفنت امجادها

ده غير ان الاب لازمه ولد يساعده في المعايش

و لو مجابهوش بيتجوز مرة و اتنين واربعة و يبدل في الستات بالطلاق
او لو حاله مش تمام يتجوز و يخلف اربعتاش خمستاشر مرة كده
لحد ما يجي له الولد اللي هيحمل اسمه

هو بصراحة مش اسمه و بس و همه كمان
امال مين هيورث الحمل بتاع الخمستاشر بنت اللي قبله

احنا لو فاهمين صح الحياة هنعرف انها مجرد مرحلة بعدها الاخرة
و هناك مفيش افضلية الا بالتقوى
لا بالولد و لا بالعائلة

و لو فاهمين صح يعني ايه خلافة الارض و تعميرها
هنعرف ان التعمير لازم يكون بالذرية الصالحة اخلاقيا و دينيا مش بجنس الذرية دي
و انك مش هتكسب حاجة لو ابنائك مليون و معندكش تربيهم و تعلمهم و تنشئهم على خلق و دين
و مش هتستفيد منهم لو طلعوا عواطليه و مش لاقيين ياكلوا
يعني احنا دلوقتي 80 مليون عملنا ايه؟؟؟
الفراعنة مثلا كانوا كام و عملوا ايه؟؟؟ اكيد واضح ان العدد مش مهم
المسلمين في اول الاسلام كانوا الاف لكن غيروا الدنيا من حواليهم
احنا ملايين من المسلميين حاليا و حقوقنا اتسرقت و مش عارفين نرجعها

البنت فعلا بتساوي الولد في الكون و في الحساب امام الله
هما الاتنين معا يقدروا يعمروا الكون و يحفظوه و يعبدوا الله و ينجبوا نسل على خلق ودين
و يحفظوا اسم العائلة و يصونوه

بلاش نرجع لتفكير اهل الجاهلية اللي كان بتسود وجوهم بولادة الانثى

ممكن بنت تكون عون لابوها و سند له و تكون ذات عمل صالح
يذكره الناس و يحفظ اسم العائلة

و الا اسماء النساء اللي افادوا اممهم دي وصلت لنا ازاي و عرفنا ازاي سيرهم الذايتة و نشأتهم ؟

فين اهل الدين و فين دور الاعلام يوضحوا ضرورات استخدام التحكم في جنس الجنين ؟
و لا هتسيبوا الناس يقلبوا الموازين و يغيروا خلق الله بلا اي رقابة اخلاقية و دينية
عشان الرزق او الاسم و التفاخر

اهل العلم وضحوا الضرورات كمان اهل الدين طالما افادوا بانه جائز
لازم يوضحوا ليه جائز ؟
و ايه اثم استخدامه لاغراض غير علمية و لا فائدة منها اجتماعيا


عارفين ليه موضوع الانترنت و الموضوع ده متصليين

لان الاتنين فيهم نفس الطريقة الشائعة للتعامل منا
الاستخدام الاسوأ


يعني انتم عايزين تفهموني ان كل اللي هيستخدم الموضوع ده
عارفين ان بناتهم هيتولدوا بامراض
عشان كده الاولاد افضل
او العكس ده لو حد يعني راح طلب انه يتولد له بنت

اكيد لا
لاننا مش كلنا معانا فلوس للمتابعة الصحية الدقيقة قوي دي
بس في ناس معاها
و عندهم رغبة يبقى معاهم الاتنين .....زينة الحياة الدنيا
المال و البنون

و الفقراء بقى مالناش دعوة بيهم يخلفوا بنات ....ده حتى البنات مرزقين
يخلفوا اطفال مريضة وايه يعني ؟.... هما اساس ايه اللي يخليهم يخلفوا اصلا


الفرق بين الموضوعين ان الانترنت بقى في متناول الجميع
لكن الموضوع ده لسه في اوله
لكن طبعا هيوصل مع الوقت
لان العلم متطور و متجدد مع كل ثانية في جديد
مش عندنا طبعا لاننا لسه بنستورده فبياخد وقت شحن ونقل
لكن هيوصل و هيرخص و هينتشر

ده غير ان في ما بينا اللي عندهم من المال اللي خاليهم بالطريقة دي يجيبوا للبشرية
جيوش من الرجال المعدلين


مش نفس الاسلوب التعامل برضو ولا انا غلطانة ؟؟

الاستخدام الاسوأ (1)...الانترنت

السلام عليكم

كان في موضوع في دماغي نفسي اكلمكم عنه و بعدها بوقت مش كتير رجع لفكري موضوع تاني مختلف تمام
و اكتشفت في النهاية ان الموضوعين ممكن يكون بينهم رابط
من وجهة نظري هو رابط قوي
الرابط ده هو
طريقة تعاملنا معاهم

اكلمكم عن الموضوع الاول

انا كنت بافكر في الانترنت
تحديدا في نظرة مجتمعنا للانترنت

لاحظت ان كل اعمالنا الفنية اللي بتتعرض في التلفزيون او الراديو ايا كان العمل
جاد او هزلي

بيعرض تعامل الشباب مع الانترنت من زاوية واحدة
يعني لو ولد بيدخل على مواقع مش كويسة و بيتعرف على بنات
و لو بنت بتتعرف على ولاد برضو و بيضحك عليها او هي بتضحك على حد


دي غالبا الفكرة الاعم اللي بيتقدم بها الانترنت
حتى البرامج دايما يناقشوا ليه الاقبال على الشات و المواقع السيئة هو نهج الشباب على الانترنت

من كام شهر كده كنت باسمع اذاعة القرآن الكريم
و كان الشيخ بيشرح الزوج بيكون ازاي مقصر في حق زوجته
فطبعا كان لازم ينوه عن الانترنت
هو ما قالش في ازواج بيقضوا وقت طويل على الانترنت

هو قالها كده " الزوج يفضل طول الوقت منصرف عن بيته باستخدام الانترنت و تصفح المواقع و استخدام الشات "
و انتم طبعا عارفين ان ده بيشيع الفساد الاخلاقي
و ده انا معاه فيه طبعا

لكن هل فعلا الانترنت هو بس مدخل للمفاسد
هل ينفع اني اقصر نظري على مفاسد الاشياء
الفكرة مش في ان الانترنت نفسه مفسدة

استخدمنا له هو اللي فاسد

و بالتالي مينفعش اوصل لكل بني ادم على الارض انه مصدر الانحلال الاخلاقي
بغض النظر عن انه ليه منافع اخرى اهم بكتير
الفكرة هي اننا كمجتمع اتعودنا لما يجينا شئ جديد من بره
نستخدمه من الزاوية السيئة
اسوأ استخدام

و لما كانت السيئة تعم والحسنة تخص
بتكون نظرت العامة للشئ ده انه فاسد و مصدر فساد

دور الاعلام واهل العلم
مش بس انه يقولوا لي ده في مدخل معين لو دخلت منه تبقى دخلت دائرة الخطأ
دورهم كمان يوضحوا الاستخدام الامثل

انا مثلا طالبة في هندسة
مطلوب مني اكون على علم بكيفية استخدام الانترنت طبعا الى جانب جمع المعلومات من خلاله
مطلوب مني اطلب المعلومات او اتبادلها
عارفين انا بيطلب مني كام تقرير او بحث خلال السنة ؟؟
كام محاضرة بانزلها من موقع الكلية مثلا او بيبعتها لنا الدكتور على الايميل
حياتنا الدراسية كلها .......انترنت
انا مش متخيلة حياتنا في الكلية من غير الانترنت
كمية المعلومات اللي باحصل عليها بشكل سريع
و حجم الاتصال اللي باكون فيه مع زملائي اللي بيشاركوني في الشغل
او مع الدكاترة والمعيدين

لو الانترنت مش موجود .... احنا كنا هاندرس ازاي ؟؟
طيب وطلبة طب و صيدلة و اقتصاد واعلام
كانوا هيجيبوا منين الجديد في العالم

ليه الاعلام مش بيقول للناس ان في فئة في مصر بتستخدم الانترنت في تحصيل علم ما
و برضو بنستخدم الشات الفيس بوك بس بشكل محترم
لاننا مدركين الاستخدام الامثل و عندنا اخلاق

مش عيب الانترنت ان له مستخدمين ما عندهمش اخلاق
في بلاد دلوقتي جهل استخدام الانترنت فيها = امية
و فيها اطفال بيعرفوا يجيبوا معلومات مهمة و يستخدموها و يتبادلوها
احسن من ناس كتير عندنا معاهم شهادات علمية محترمة قوي

احنا عندنا الغلط واجبنا نصلحه مش نعمل حالة رعب
و كأن الانترنت ده مرض مزمن

و اللي عنده انترنت في بيته لازم ولابد يكون واحد من اياهم الوحشيين

تخيلوا حالة الرعب اللي عملتوها لابائنا و امهاتنا
و كأنهم سيبين ولادهم مع شيطان

الافضل .... نقوم الصبح بدري

السلام عليكم

بما اني من الناس العظيمة اللي مش بتنام لا صبح ولا ليل
فقاعدة بقى اراقب في مخاليق ربنا طول ما انا صاحية
و طبعا لاني مش بيعجبني العجب فمعظم اللي بيعملوه بيحرق دمي
عشان كده النوم بيريحني جدا حقيقي

انا مش بانام لاني انا بوظت الساعة البيولوجية بتاعتي
لاني من مدمني السهر
فالموضوع بقى تعود
و بعدين مع الوقت بقيت صبح وليل صاحية
كمان بما اني في الاجازة وقاعدة في بيتنا يعني باسهر لي شوية قبل الحرب ما تبدأ
اقصد الدراسة بعيد عنكم
السبب اني باكتب الموضوع
هو اني مش بس الوحيدة اللي بتكون صاحية
انا لاحظت في شارعنا مثلا
ان الناس طول الليل صاحية زي حالاتي
يمكن من الحر
و يمكن عشان رمضان بقى و الخمستاشر الف مسلسل سهرانين يتفرجوا
او سهرانين يصلوا ويذكروا ربنا ...و ده الفرض التاني مش لسوء ظن مني بس لانهم بيعملوا ظيطة جامدة جدا
كلام على زعيق على ضحك على خناق
و العبادة المفروض بتنشر السكينة و الهدوء

و بعدين يفضل الحال ده لحد قبل الفجر ببتاع نص ساعة كده
فجاءة
سكوووووووووووووووووون
لو رميت ابرة تسمعها و هي بتخبط في الارض
سكووون رهيب
ما بيقطعش السكون ده الا اذان الفجر و الصلاة
و بعدها نفضل في السكون ده لاذان الظهر
ممكن بقى نسمع خلال الوقت ده خطوات الناس اللي رايحة اشغالها
انا عن نفسي شايفة ان الوضع ده مش طبيعي
المفروض العكس
طول الليل هدوء و اول اما الفجر ياذن يبدأ الناس يصحوا
لان المفروض ان الفجر صلاة مفروضة ده غير انه بعد الفجر ساعة توزيع الارزاق
المفروض نبقى صاحيين الوقت ده بنسعى على ارزاقنا
نكون في كامل نشاطنا و همتنا مش لسه نايميين
مع الوقت برمجة جسمنا بتختلف زي محصل معايا كده
طول الليل نصحى في بقى سبب او مفيش سبب
طول الليل بنعد النجوم اللي في السما
او مبحلقين في السقف او التلفزيون او الكمبيوتر
و طول النهار مهدودين او نايميين
ده غير اننا بنتحرم افضل الساعات اللي بتمر في اليوم


بداية اليوم بدري بتكون جميلة جدا
الهوا بيبقى انقى والسما اصفا
و لسه الشمس الحارقة ما شدتش حيلها علينا
و ابواب السما بتكون مفتوحة للدعاء في وقت الفجر و وقت توزيع الارزاق
مينفعش يعني نبقى في الوقت ده نايميين او داخليين ننام
هنتحرم من بداية اليوم و هنفقد بركته
عشان كده بنحس ان اليوم متعفرت و الوقت بيمر هوا
لان معظم الوقت اللي كان المفروض نعيشه نمناه


المفروض اننا نبدأ نعدل اللغبطة دي
هي حاجة بسيطة بس ممكن تغير كتير

فن الاستفزاز (1)......السائرون نياما

جامد قوي العنوان ده كان اسم رواية مشهورة

السائرون نياما ..هما مش نياما قوي يعني

لما باكون خارجة من البيت الصبح بدري

سبعة صباحا مثلا

بيبقى جوايا امل اشوف في اليوم الجديد ده وجوه جديدة مبتسمة تقلل شوية من ضغط الحياة المتواصل

ابتسامة جميلة من ست كبيرة و دعوة فيها حنان و روح الزمن البسيط

او ابتسامة بنوتة في ثانوي مستعجلة عشان تقابل اصحابها وتديهم تقرير باحداث الامس

ابتسامة واحد شقيان رايح الشغل و بيتمنى ان المرتب ما يتاخرش الشهر ده كمان

الامل بيدي الابتسامة معنى ساحر خلاب... تنسى معاه كل همومك ومشاغلك

امبارح وكوارثه

والنهاردة ومشاكله

والمستقبل و الخوف منه

انسى كل الكلام اللي قراته فوق ده انت مش في اوربا

Pay attention... you are in Egypt

الوضع عندنا مختلف

احنا بتوع الابداع

عارفين الكلمات العربية الصعبة

التجهم والتبلد واللامبالاة

الناس الصبح بتبقى جامدة جدا متجمدة متجهمة قاسية الملامح

الطبيعي

ان البشر بيتبادلوا المشاعر .... في علماء بيقولوا ان المشاعر زي الشحنات

يعني الانسان بيكون زي مصدر اشعاع و حواليه مجال لاشعاعه ده

يقدر اللي حوليه يدخلوا المجال ده ويشاركوه الشحنة

تعالوا نتشحن شوية

زي ما قلت الطبيعي الصبح تكون مبتسم لانه بداية يوم جديد الطبيعي كمان انك تكون متحرك كلك نشاط

الغريب

ان السمة الاساسية للناس بتكون غير كده

جمود

عقارب الساعة ماشية بسرعة وهما محافظين على رتم عجيب هدوء و تبلد غير عادي
لو انت مضايق حاول تغير الحالة و طالما في جديد اتجدد معاه .ايه المانع؟
يمكن اعباء الحياة القاسية هي السبب في الحزن الصباحي ده

ويمكن سحب الملوثات مخبية الشمس

فالناس مش واخده بالها منها

ما علينا

هتقابل الصبح اللي نايم ومغمض عنيه و بيتحرك بس لان رجله حافظة الارض بحصها

و ودانه حافظة ايقاع الخطوات

هتلاقي اللي فايق شوية ويتثاءب و ماشي يخبط في اللي حواليه

وفي اللي فايق وماشي بيشتم في اللي سابهم في البيت ولا اللي لسه رايح يقابلهم

هتلاقي برضو اللي مانامش اصلا و واقف على ناصية الشارع عشان يعاكس او يدخن او يناكف في مخاليق ربنا

في بقى من هم احسن حالا॥وقدرة اعلى على الادراك

دول تقدر تتشحن بمجالهم ....... لكن

شحنة سلبية

ده من الاستفزاز اللي بيحتكوا به احتكاك مباشر

عند كشك الجرانين مثلا او عند بتاع الفول والطعمية او فرن العيش

كشك الجرانين

اللي بيشتري جرنان غالبا ما بيكون جرنان معارضة....... بتشتري جرنان معرضة عشان تخرج الشحنة او تتشحن

في اللي بيشتري جرنان المعارضة عشان هو بيحب يحرق دمه بالاخبار او عايز يخرج

شوية شحنات في انه يتكلم مع زمايله في الشغل ويستعرض عليهم معرفته الهايلة

بالسياسة والاقتصاد و الفن والادب

و فيه اللي بيشتريها لانه لسه مش مصدق ان دلوقتي هو قادر يقرا لناس بتهاجم سواء معاها حق او لا

بس صوتها طلع...... ممكن نقول معجب بتغير اللهجة

و في اللي بيلقي نظرة على الجرنان ويرجعه مكانه تاني استفزازا لصاحب الكشك

و لا يمكن ملاقاش اللي يشده و وارد يكون مش معاه تمنه

طبعا في ناس بتشتري الجرانين القومية زي حالاتي كده

لانهم عارفين انه قومي ولا معارضة كله في الاخر هيتلف فيه سندويتش الفول

ولو واصل شوية هيتعمل له

تدوير و يبقى ورق جديد قد الدنيا

بتاع الفول

في حاجة انا ملاحظها

بتاع الفول بيحط السندوتشات في ورقة جرنان

الناس بتاكل السندوتش وتقرأ الورقة

ليه؟

غاويين اخبار بايتة مثلا ولا بيدرسوا التاريخ

كمان ايه الميزة من اني اقف اكل في الشارع على قارعة الطريق لا و كمان اقرا اخبار بايتة

ايام زمان ده كان يعتبر من مراتب سوء الخلق

المستفز فعلا ان كشك الفول واقف والناس حواليه

في تحدي مستفز جدا للعربيات اللي رايحة وجاية مستعرضة سرعتها

المنظر سئ جدا

دخان وتراب وقطط وكلاب و اكل في الارض

و الناس بتاكل عادي جدا

يا سلام بقى لو الرحلة لفرن عيش

اهوه هو ده الاستفزاز بعينه

عارف ان دي يعني ايه تنزل من بيتك الفجر تقف على الفرن مستني انه يفتح ويخبز لانك

فرصتك الوحيدة عشان تاكل الخبز المحشوى بخيرات ربنا من حصى وتراب وبقايا

اشوال الدقيق

ولو حظك عال يطلع لك مسمار

الخبز المصري هو الوجبة الاساسية من ايام الاجداد الفراعنة..... زي ما كان القمح هو الزراعة الاساسية

ممكن بقى وانت واقف تشوف اشوال الدقيق وهي بتتسرب عشان تتباع

اكيد كمان هتشوف اصحاب وقرايب ومحاسيب صاحب الفرن وهما بينقلوا العيش بكميات لبيوتهم وبيوت محاسيبهم

هتشوف الفران وهو ملك زمانه بيشخط ويزعق و يقول لفلانة اسكتي ولعلان ارجع ورا

و لو مش عاجبك

اخبز في بيتكم يا كبير

و يمكن كمان تشوف اللي واقف في الطابور لاغراض اخرى

كفاية عليا كده النهاردة و عليكم كمان

نكمل وقت تاني ان شاء الله

فن الاستفزاز.........مقدمة

السلام عليكم

جربت تقعد في البيت لمدة يومين تلاتة كده

وتركز قوي في الايام دي على الهدوء والسكينة وراحة البال

انعزل عن الناس لفترة او تعامل معاهم في اضيق الحدود

تعاملات مرحة لطيفة ابعد تماما عن العصبية

Try to be happy

بعد اليومين او التلاتة دول انزل شغلك.... كليتك اي حاجة

بس انزل الشارع وخلاص

اتمشى او اركب مواصلات

ايه رايك مش ملاحظ حاجة؟؟

فن الاستفزاز

الاستفزاز فعلا فعلا فن

مش اي حد يتقن الفن ده ومش اي حد يوصل منه لنتيجة

جربت تبقى مُستِفز

لو استعرضت يومك من اوله لاخره اثناء احتكاكك بالناس هتلاقي انك احد اتنين

مُستِفز او مُستَفز

تفرق

الاولى اسم فاعل والتانية اسم مفعول

احنا شعب يجيد فن الاستفزاز ببراعة

ايه رايكم لو اخدكم في رحلة للشارع

للمواصلات .....للكلية

هاعرض عليكم الحاجات اللي بتستفزني

عشان ننهل معنا من منابع الاستفزاز

يمكن نصاب بمناعة

او نوصل لمصل

استمتع بالحياة

كنت باتفرج على مسلسل همس الاشباح
و كنت مضايقة عشان الشبح بتاع النهاردة
هو كان شاب مريض
و عارف انه هيموت و مع ذلك اصر يعيش كل ثانية من حياته
اصر يستمتع بها بلا خوف او قلق
حتى بعد ما مات شبحه استولى على جثة شخص تاني عشان يحضر به حفلة ... على سبيل السلف يعني ( المسلسل كده انا مليش دعوة ..واحدة بتتعامل مع اشباح و بتحاول توصلهم لنور النهاية اللي يخرجهم من حبستهم في الارض.... كل يوم قصة شبح )

بالضبط شبح اليوم
شبح اليوم بقى حد مؤمن بقيمة الحياة جدا
و عايز يستمتع بها على الرغم من انه كان بيعاني من مرض عصبي و مقعد بسببه
لكن كان عنده عزيمة و شخصية اهتمت به و ساعدته
الراجل بقى اللي هو استولى على جثته
كان شخص وسيم و مشهور
لكنه ضيع حب الناس له و ضيع دراسته و عمله
و في الاخر انتحر
النقيضان
في حد اتحرم من حاجة فشاف الجميل في بقية الصفات اللي عنده
و شاف اجمل الاشياء بالحياة و اتعامل بايجابية
و حد كان معاه سمات خاصة فاستغلها غلط و لما اضر شاف بس نهاية الحياة

طيب انا ايه اللي ضايقني ؟؟
المسلسل بيعرض حياة اشباح
يعني ناس خلاص ماتوا ده في حد ذاته ضغط على الاعصاب بصراحة

معظمهم عايزين يرجعوا للحياة
يصلحوا حاجة غلط عملوها
حاجات ممكن تكون سبب موتهم
او حاجات عرفوا قيمتها بعد ما فات الاوان
اللي ضايقني ده تحديدا
تلقائي بلاقي نفسي باعمل احلال
باحط نفسي مكان شخص ساب الدنيا
و قدامه وقت قليل قوي يصلح في حاجة
يراجع سجل حياته
و يدور على حد كان مهتم به
حد ساعده
حد هو اساء اليه
حد احبه بجد

فرصة الوقت دي اساسا مش موجودة حقيقي
فليه و احنا في الدنيا مش و اخدين بالنا من ده؟

يعني لو انا مت حالا..
بعد الموت ايه حالي ؟
هل الناس هتفتكرني بخير و لا هي ما صدقت خلصت مني ؟
في حد هيزعل على فراقي ...
في حد كان المفروض اوصل له حاجة قبل ما انتهي ؟
هل في حد كان نفسه يوصل لي حاجة و انا ما استقبلتهاش؟
هل اتهاونت بحد و جرحته؟
صحيح هيكون سبق السيف العزل
لكن هيحصل

اللي ضايقني زيادة
اني مش زي الشبح البطل ده
على الرغم من اني باحلم اجدد الحياة
لكن مفتقدة احساسه و عزيمته
الاستمتاع بكل نفس و حركة
بكل ابتسامة متاحة
و بكل لحظة صدق
بكل فرصة لتحقيق حلم كان بعيد

ليه بنشوف الدنيا بالوان بهتانة او الوان غامقة؟؟؟؟؟

غالبا لان الحزن و الخوف مشاعر سهل جدا تسيطر على الروح المضطربة
اللي مصرة تشوف بس نص الكوباية الفاضي

في مدرسة غاندي

السلام عليكم

كيف الحال ؟؟؟؟؟ يا رب كل خير باذن الله

السنة دي اخترت قدوتي في الحياة

اها ........ قبل كده مكنش عندي قدوة

كل ما اسأل حد من زمايلي مهندسي المستقبل عن قدوته الاقي اسماء قوية

زويل .. فاروق الباز .... بيل جيتس....... كل وحد بيختار حسب تخصصه بقى

كنت باحس بالنقص لاني مش قادرة اوجد لنفسي قدوة علمية مغيرة قوية
تشبع طموحي

عشان كده صرفت نظر عن موضوع القدوة ده
انا صراحة ما اتعقدش اني ممكن اغير في اتجاه العلم
ممكن في اتجاه تاني

و اصراري على تجاهل ده بادفع ثمنه غالي جدا حاليا


المهم

السنة دي قررت احدد انا مين قدوتي
متأخرة صحيح
لكن عادة الزمن عندي بيتحسب بعطائي خلاله مش بالسنين

كمسلمة و افتخر بهذا فقدوتي الاولى و الاسمى هو النبي محمد عليه افضل الصلاة والسلام

النموذج الامثل للانسان بالمعنى الاسمى ......كلما استرجعت بعض من مواقفه عليه افضل الصلاة والسلام

باحس قد ايه احنا بعيد ........ بعيد قوي قوي

ربنا يعينا و يردنا للطاعة و للانسانية

قدوتي التانية هو " عمر بن الخطاب " الفاروق

القوة و العزة بالحق ..... الحاكم العادل الصالح

اللي عرف انه لانه حاكم فواجبه اكبر و راحته اقل
و مهمته واضحة
رعاية الامة و خيرها لا اقل

انت فين يا عمر ........ لو تعرف حالنا ؟؟؟؟؟

دول قدوتي على المستوى الاسمى

خارج نطاق المقارنة مع اي بشر

نبي الله المصطفى و خليفته الرشيد الفاروق

قدوة التعامل الامثل ........ الاخلاق الاقوم


في الفترة الاخيرة بدات ابحث عن بعض الشخصيات اللي اعرف عن كفاحهم و عن قيادتهم للتغيير في العالم
بما يناسب شخصيتي

فوجدت انه فيما بعد انطفأ جذوة النهضة الاسلامية و هدوء المارد اللي انار العالم

بدأ الفساد الاستعماري في االانتشار
الطمع في الثروة و الرغبة في الاستاثار بالافضل الثروة و الجاه
و ثورة عروق التعصب و العنصرية

الاستعمار و مكافحته على مستوى العالم

اخيرا اشتغلت معايا قوانين الجاذبية للاخ نيوتن ..... انجذبت بتلقائية لغاندي

القائد المناسب تبعا لشخصيتي

اللاعنف ......... المقاومة..... الانتماء للوطن ...... الاكتفاء الذاتي ......... قبول الاخر

افكار اعتقد فيها بشدة

الفكرة ان مقاومة الظلم مش قاعدة تكون دموية بحته......
ايماني بعدالة قضيتي و ثباتي على مبادئي القيمة اقوى مقاومة

انتمائي لقضيتي و للحق......

انتمائي لبلدي
لترابها
و فكرها
اسلوبها
و ثقافتها
و ترجمة الانتماء لعمل مثمر

المقاطعة و التحدي و الثبات مهما كانت النتائج
المقاومة الهادفة

ده فكر غاندي و اسلوبه

غاندي قاوم تمييز بريطانيا ضد الهنود و الاقليات بجنوب افريقيا وقاوم احتلالها بالهند

و رفض فكرة تقسيم الهند للهند و باكستان
و دفع حياته ثمن ايمانه بحق الاخر المسلم في الحياة
و حقه في انتمائه للهند بلده حتى لو كانت الاغلبية من الهندوس



الحق شجرة بتضرب جذورها لاعماق اعماق الارض ....
و من رابع المستحيلات القدرة على اقتلاع شجرة الحق العتيقة

الاسطورة غاندي هو بداية مدرسة ضمت فيما بعد .. مارتن لوثر كينج و نيلسون مانديلا

التغيير بقوة الحق و الارادة

بالانتماء الفعال ( العمل )


الهنود بينظروا لغاندي على انه الاب الروحي للهند

و من نفس المبادئ القوية انطلقت الهند لربوع العالم المتطور
لو نظرت للهند و لثقافتها هتلاقيها ثقافة منطلقة من بلد عريق للعالم باثره
ثقافة مميزة و نمو اقتصادي متسارع جدا

و على الرغم من ده هتلاقي فيها من هم تحت مستوى الفقر

لكنها اختارت هتصدر للعالم ايه بالضبط؟
اختارت التغيير
الاقتصاد
التسلح النووي

حتى على مستوى الانتاج الفني

في حد ما سمعش عن الافلام الهندي؟؟؟؟؟!

ما يصحش كده

السلام عليكم

وحشتني الكتابة والله بس نعمل ايه في الكسل بقى

النهاردة قررت اقطع حالة الكسل دي واكتب لاني بصراحة اللي شوفته النهاردة كان كتير

النهاردة اجازة و كنت مضطرة اروح الجامعة ........ طبعا المطر بتاع امبارح كان مبهدل الشوارع في جمهورية حلوان

بس الحمد لله جاهدت لحد ما وصلت للمترو و الحمد لله وصلت سليمة ....صحيح الهدوم بقت مطينة و الجزمة بني في ابيض اعتقد انها كانت سودة بتلمع و الله

بس حصل خير

كان في حاجة غريبة جدا المترو كان فاضي قوي.... غالبا لان النهاردة الجمعة او لان المطر و تحذيرات هيئة الارصاد خلوا الناس مش تخرج

يمكن

لكن الغريب اني انا على طول باركب عربية السيدات

النهاردة قلت هاركب العربية الاولى للسيدات و فعلا ركبتها
بعد ما ركبت كان في راجل راكب العربية مع بنته
و اول ما دخلت الرجالة اللي كانوا بره شافوا الراجل ده فركبوا هما كمان .... ما هي هيصة بقى

اللي يستفز ان العربية عليها اعلان واضح و صريح ........للسيدات حتى التاسعة مساءا

هما مش هايكلونا ماشي ....احنا بنركب معاهم بقية المواصلات عادي و بنعاملهم في الشغل و في الشارع

مفيش مشاكل

بس ده المترو و الزحمة في المترو مختلفة ففصل العربيات شئ من وجه نظري ضروري و حتمي
الفكرة انه كما مكتوب وواضح ....... واضح جدا جدا

في عربيتين للسيدات و مكتوب للسيدات
فتلاقي شاب و لا راجل داخل ولا همه و كمان مستفز تقوله دي سيدات يقولك اشمعنا

هو ايه اللي اشمعنا دي ؟؟؟؟! ... حضاريا و احتراما لنفسك ولغيرك لازم تتبع التعليمات خصوصا لو واضحة جدا

في بقى اللي بيقول اسف ما اخدتش بالي ..........ده طبعا عذر اقبح من ذنب

طيب نعمل ايه عشان ساعدتك تاخد بالك؟؟؟؟!

اعلان و موجود .......علامة في الارض موجودة

نعمل ماكيت لست ونعلقه على العربية ولا نعمل ايه بس؟؟


التصرفات دي مستفزة جدا

انك تكون عارف حاجة انها غلط و تعملها لمجرد ان حد تاني عملها وفلت
ده تصرف غبي جدا

و عيب

ما يصحش



لما وصلنا محطة المعادي كانوا الامن رجعوا و خرجوا الرجالة اللي كانوا احتلوا العربية
و لا كان في حاجة غريبة حاصلة


الحاجة التانية اللي استفزتني برضو

انه اثناء ما كنت راكبة المترو في وجود الاحتلال الرجالي ده

كنت قاعدة على مقعد لوحدي و في قدامي مقعد مباشر يقعد عليه اتنين

من حظي الرائع قعد عليه ولد و بنت....... شاب وفتاة

تقريبا كده هما كانوا ناسيين انه ده مترو ..

الموقف حقيقي كان مستفز و مقرف جدا

بعيدا بقى عن البنت والولد دول
انا عايزة اسأل

هو احنا اخلاقنا خلاص اخدت اجازة للدرجة دي؟!

في مكان عام و في رجالة و ستات و بنات و شباب و اطفال في مكان واحد

و تلاقي واحد وواحدة قعدوا قدامك و اللي ناقص اتنين ليمون و واحد بكمنجة

طيب انا قاعدة قدامكم في وشكم خبط لزق ...منظر حقيقي مقزز


يمكن متجوزين ....... يمكن بس انا ما اعرفش ده و لا غيري يعرف

و لا هو طبيعي التصرف كمان اصلا


ده بقى منتشر بشكل عجيب في بلدنا ....... بتشوفه في المواصلات و على كوبري النيل و حتى في الجامعات

بس اخلاقيا و دينيا دي تصرفات مرفوضة.

حتى الحب نفسه لو هنسمي تصرفات الاطفال دي حب
الحب شعور برئ جدا و المحب واجبه حماية نصفه الاخر

مش المنظرة به كده


ما يصحش
عيب

لو لسه الكلمات دي ليها معنى عند حد

ما يصحش وعيب نخرج عن اخلاق مجتمعنا و ديننا
و نجرح عيون غيرنا بمناظر نشاز جدا

يعني قاعدة مع ولد او ماشية معاه في الشارع او في مواصلات و منظركم مش لائق ابدا
و مستمرين في ده ببجاحة تحسدوا عليها
و يا سلام بقى لو محجبة كمان

طيب ليه كده ؟ يعني ايه وجه الاستفادة من ده

بتستفزوا مين ؟ او بتتحدوا مين ؟

غالبا هو بيتمنظر بكِ

و الناس اللي في الشارع في مجتمعنا اللي بيعتبر الراجل حر في تصرفاته
دائما بتبص لك انت باحتقار

و بتسبك و بتعرضي نفسك لتعليقات خارجة

بالنسبة له هو مفيش مشاكل ..... راجل في مجتمع ذكوري

لكن انت مالكيش حجة

حتى محدش بيتعاطف معاكي و يقول مضحوك عليها

لانه ببساطة كل بني ادم مننا ربنا اعطاه عقل و قلب و نفس

لو هو قرر يرخص نفسه محدش هيعلي قيمته ابداا



اعتقد ان بلدنا محتاجة بوليس للاخلاق ...... لان المناظر دي لو استمرت
احنا هانغوص في مستنقع مميت للانحراف على كل المستويات


النجدة يا اهل الدين بدل الكلام في القضايا الجدلية اللي اكل عليها الزمان و شرب

و بدل الافتاءات المثيرة

ركزوا مع الناس

احنا محتاجين جهودكم في مساعدتنا في زمن الشبهه

ساعدونا نجاهد انفسنا

هتتسألوا علينا امام الله

انا والعفريت

لما باتخنق على الاخر من هموم الحياة والمشاكل اللطيفة ( ربنا يجعل كلمنا خفيف عليهما )
باتجه لكتاب قوة عقلك الباطن اللي مش عارفة اخلصه حتى الان
في كل صفحة من الكتاب الكاتب بيحاول يثبت للقارئ ان التفكير الايجابي في الاشياء
و اقناع العقل الباطن انه بامكانه تحقيق الافضل ... وسيلة رائعة لحياة افضل و لتحقيق الاحلام

انا مقتنعة بكلامه التفكير الايجابي افضل على جميع الاصعدة

الغريب اللي بيقوله اني لو اقنعت عقلي الباطن باني هاحصل على شئ معين ....ممكن فعلا احصل عليه

زي فيلم the secret كده

طيب

في كل مرة بارجع للكتاب او للفيلم ده بافكر كده
لو حصل و كنت محظوظة زي اخونا علاء الدين و كان في ايدي مج الشاي العظيم بتاعي
و قمت دعكته و هو مليان شاي ( المشروب الرسمي بتاعي ) .........قال يعني بادفى

و فجاءة طلع منه ابخرة .......... قوم انا قلت يمكن ده بخار الماء المتصاعد من الشاي المغلي ( هندسة كميائية )

و فجاءة كترت الابخرة و عملت سحابة كبيرة و بدل ما تمطر

طلع لي استاذنا المارد الطيب البركة اياه و قالي :

شبيك لبيك ....انجزي في السريع يا ست تجديد و قولي لي نفس ساعدتك في ايه ؟

قوم انا بقى وقفت كده في حالة اذبهلال بحت ( محدش يقولي يعني ايه )

و بعدين تداركت الموقف في سالة و قررت اتعامل مع الموقف

انت كنت فين يا راجل ده انا مستنياك من زمان

تحت امرك ....... انت بس تأشري وانا احمر

نعم يا اخويا ؟؟؟!

قصدي انفذ .......اوامرك يا كبير

عفريت بيئة قوي......... بس اصله عفريت روش
مش ممكن يعني هيطلع لي عفريت من القدام دول

امال Renew ازاي ؟؟؟؟؟؟
المهم قلت له :

شوف يا بني انا دخلت الكلية من حوالي اربع او خمس سنين مش فاكرة تحديدا و زي ما انت عارف و العارف لا يعرف
انها كلية جابت اخري و كرهتني في حياتي و في عرق الوطنية اللي كل شوية ينقح عليا و مبوظ ضغطي
مع اني دخلت بحبها و كان نفسي اصلح حال البلد
قال يعني انا اللي هاعملها و هاحرر العقول من الجهل و التخلف
و انا اللي هابني الاقتصاد الحر المنافس

و هاوفر شقة لكل شاب ........ و عريس لكل عروسة ..... و وظيفة لكل عاطل

و مؤهل لكل فاشل ( زي حالاتي كده )

و بدل سيارة لكل اخ واخت من راكبي المترو ...هاجيب لكل واحد طيارة..... اهم يتخانقوا فوق احسن
خلي الناس تنبسط


يا اخت غاندي ...... اطلبي قبل ما اولع في نفسي وفيكي .... انا عندي السكر و شايل المرارة اساسا .... بلاش غم الله يكرمك


اهلا .... انت عفريت خلصان اصلا ... هو انا حظي ده على طول
طيب خلاص ..... شوف انا عايزة اتخرج في الكلية دي بقى
بس بانجاز كده .. يعني مثلا بتقدير جيد جدا و لا اقولك خاليها امتياز احتياطي

و عايزة اتكلم بتاع سبع لغات كده ...... غير العربي طبعا عشان انا عارفة في عفاريت فهمها محدود

يعني مثلا .انجليزي و فرانساوي و الماني ( انا باحب الالماني ) و روسي و ممكن صيني ( عشان ارطم مع الست اللي كل شوية تخبط و تقولي عندكم اروسة ) و اختار انت الباقي على ذوقك



اممممممممممممم



بعدما تعوج لساني بقى بكل اللغات دي ... عايزة موبيل باربع كاميرات عشان يبقى فالته كده بدل المنيل اللي عندي ده
و لاب توب محترم كده و ابن حلال عشان انا الكمبيوتر ده طلع عيني
و عربية بسواقها عشان انا مش بحب السواقة

و عايزة بتاع مليار دولار كده ..... خالصة الضرايب و حياتك


اممممممممممممم


يا ريت تكمل جميلك كده و انا شيفاك مارد طيب وابن حلال و صاحب عيا
و تشوف لي عريس ابن حلال زيك كده ....طوله مناسب و غير مدخن
مستقر ماديا و لديه وظيفة محترمة و تغطية طبية و يحتكم على شقة ( يكون دافع ضرايبها برضو ) ..و يكون كده شاطر يجيد السباكة والنجارة واعمال الكهرباء و الحياكة كمان ....زي الرجالة الاجانب السبع صنايع دول

و يا سلام بقى لو بيعرف ينظف الشقة كمان... و انا اطبخ عادي مفيش مانع

و زي ما الجرايد ما كانت تكتب زمان....... لديه رغبة في الاستقرار و مقبل على الحياة

اه و حياة ابوك .... لازم يكون مقبل على الحياة ..... احسن انا مش ناقصة حد يسدها في وشي كمان و كمان

و طبعا مأمن عشان اعيش انا مطمنة



مش عايزاه بينور في الضلمة كمان و يقول بابا و ماما



لا تشكر ........ الله يكرمك كده رضا قوي



رضا كل ده و رضا ....طيب و سعي كده فضيلي حتة عشان اشتغل فيها ...... قطيعة محدش بيأكلها بالساهل




و بعدين العفريت و لا المارد يلف حولين نفسه و يملا الاوضة دخان ابيض و سحب غير ممطرة تحدث شبورة عالية الى منخفضة على جميع الانحاء ..... و على المقيميين خارجها مراعات فروق التوقيت

ايه ده ؟؟؟؟!

طبعا ده كل احلام ...... و انا احب انهي حلمي نهاية معقولة .
نحط احتمالات و نهايات متوقعة عشان عقلي الباطن يقتنع

ممكن يحصل الاتي :


1 _ بما اني كنت باحلم وباقنع عقلي الباطن اني هاحقق احلامي و هاجيب تقدير واشتغل و اركب طيارة و كده يعني

لما افوق من الحلم وانا باكمل بقى مج الشاي اياه .يوصلني نبأ رجوع ابن عمي من البرازيل بعد ما ورث كل ثروة عمي عشان يشرب من نيل بلده .. و يتجوز من بنات بلده و يتقدم لبنت عمه المهندسة العظيمة العاقلة جدا الرشيدة قوي
و ياخدني معاه على البرازيل حيث البن المعتبر
و هناك اشرب في نفس المج اياه قهوة بقى مش شاي

حلوة النهاية دي . سعيدة

بس انا للاسف كتر القهوة غلط على ضغطي

ناهيك ان مليش حد في البرازيل كلهم هنا بيشربوا من نيلها

بلاها الحل ده نشوف حاجة تانية

2- يطلع كل اللي انا كنت باحلم به ده كله كان عرض تجاري
لشاي ( ابو تفلة ) تغليه بدل المرة اتنين

و اكون انا بقى المحظوظة الوحيدة في مصر اللي طلع لها المارد .....و الاقيهم جايين عندنا
و يصوروني انا و نفس المج اياه في التلفزيون
و اطلع في اخر حلقات البيت بيتك مع محمود سعد

و يسلمني الهدية ..اللي هي عبوات شاي ابو تفلة تكفيني انا والحي لمدة سنة خالصة الضرايب

و افتح ان ابقى كشك سجاير على الناصية في الاخر

مش نافع برضو الاحتمال ده

لاني باشرب شاي ليبتون اصلا



3- تطلع كل الابخرة و السحب دي ناتجة عن احتراقي انا شخصيا
احتراق ذاتي
من كتر التفكير و القلق اللي مش عايزين يسيبوا دماغي في حالها

قوم ايه ؟

انا اللي ولعت مش العفريت

للاسف الاحتمال ده الاقرب الى الصواب
حكم اجدادنا قالوا زمااااااااااااااااااااااان
المنحوس منحوس حتى لو طلع له العفريت من نفس مج الشاي اياه بتاع ابو تفلة